Канада һөкүмитиму бейҗиң олимпик мусабиқисини байқут қилишни ойлашмақта

Мухбиримиз әзиз
2021-08-11
Share

2022-Йили хитай һөкүмити саһибханлиқ қилиш алдида туруватқан бейҗиң қишлиқ олимпик мусабиқисини байқут қилиш мәсилиси йеқинқи мәзгилләрдә уйғурлар мәсилиси түпәйлидин көп қисим дөләтләр җиддий музакирә қиливатқан ишлардин болуп қалған иди. Бу һәқтики чуқанлар йеқиндин буян канада билән хитай оттурисидики җиддийлишватқан дипломатик алақидә йеңиваштин әң муһим мәсилиләрдин болуп қалмақта.

Канададики "дуня хәвәрлири" гезитиниң 11-авғусттики хәвиридә ейтилишичә, канада консерватиплар партийәсиниң рәиси ерин отул бу һәқтә мәхсус сөз қилип: "канада һөкүмити бейҗиң олимпик мусабиқисини толуқ байқут қилиши лазим. Чүнки бу һазир бәк чоң бир хәтәрдин сигнал бәрмәктә," дегән. Униң бу сөзи хитай сот мәһкимисидә зәһәр әткәсчилики билән әйиблиниватқан канада пуқраси роберт шелленберг һәққидики 15 йиллиқ қамақ җазасиниң 10-авғуст күни уштумтутла өлүм җазасиға өзгәртилишидин кейин һәрқайси ахбаратлардин кәң йәр алди. Нөвәттә бир қисим ахбарат вастилири хитай һөкүмиитниң канада пуқрасиға өлүм җазаси беришини "хуавей гуруһиниң каттивашлиридин мең вәнҗуниң канадада қолға елинишиға қайтурулған өч елиш һәркити" дәп хәвәр қилмақта икән.

Хәвәрдә ейтилишичә, канададики һәрқайси өктичи гуруһлар вә кишилик һоқуқ тәшкилатлири 2021-йилиниң бешидин тартипла хитай һөкүмитиниң уйғурлар вә тибәтләргә қарши йүргүзиватқан бастуруш сиясәтлирини әйиблигән һәмдә "бундақ һөкүмәтниң олимпик роһиға хилап һалда олимпик мусабиқисиға саһибханлиқ қилиш салаһийити болмайду" дәп көрсәткән икән. Канададики консерватиплар партийәсиниң рәиси ерин отул болса шу вақитлардила өзиниң бу чақириқни қизғин һемайә қилидиғанлиқини билдүргән икән. У бу қетим хитай һөкүмитиниң канада пуқрасиға өлүм җазаси бәргәнликини кәскин әйибләп: "хитай сиясий мунасивәтни баһанә қилип, бир чәт әл пуқрасиға өлүм җазаси бәрди. Буни биз һәргизму қобул қилалмаймиз. Шундақла һөкүмитимизни бу мусабиқини толуқ байқут қилишқа чақиримиз" дегән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт