Канадалиқ дипломатларниң тибәтни зиярәт қилиши тосалғуға учрап кәлгән

Мухбиримиз ирадә
2016-10-06
Елхәт
Пикир
Share
Принт

Канада ташқи ишлар министири ситифан дион хитай һөкүмитиниң йиллардин бери канадалиқ дипломатларниң тибәтни зиярәт қилиши вә у йәрдә ишқа кириштүрүлгән бир қатар қурулуш пиланлириниң әһвалини көздин кәчүрүшигә тосалғу болуп кәлгәнликини ейтқан.

Канадада чиқидиған «йәр шари вә мәктуплар» гезитиниң хәвәр қилишичә, ситифан дион бу сөзни канада парламент әзалириға бәргән бир язма баянатида қилған. У сөзидә, хитай даирилириниң канадалиқ дипломатларниң тибәтни зиярәт қилиш тәлипини очуқ-ашкара һалда рәт қилмисиму, әмма зиярәт кинишкиси елишни қийинлаштуруш, вақитни созуш қатарлиқ амаллар билән чәкләп кәлгәнликини, тибәткә беришкә рухсәт қилинған тәқдирдиму хитай даирилириниң уларға худди сайидәк әгишивалидиғанлиқини ейтқан.

Хәвәрдә ейтилишичә, тибәт аптоном районида канадаға қарашлиқ «хәлқара тәрәққият агентлиқи» ярдәм қилип иш башлиған қурулуш пиланлири бар икән. Әмма хитайдики канада әлчихана хадимлири бу қурулушниң әһвалини көрүш үчүн тибәткә беришиға изчил йол қоюлмиған. Монтриялдики канада тибәт комитети хитайниң тибәткә саяһәт қилишни чәкләш арқилиқ районда йүргүзүватқан кишилик һоқуқ дәпсәндичиликини йошурушқа урунуватқанлиқини ейтқан. Оттавада турушлуқ хитай әлчиханиси бу һәқтики соалға җаваб беришни рәт қилған.

Хәлқара кишилик һоқуқ органлири илгири елан қилған доклатлирида, уйғур ели вә тибәтниң чәтәллик зиярәтчиләр, мухбирларниң бериши әң қейин болған җайлар икәнликини, у йәргә барған мухбирларниңму қаттиқ тәқиб вә зораванлиққа учрайдиғанлиқини қәйт қилған иди.

Пикирләр (0)
Share
Толуқ бәт