Kanadaning sabiq bash ministiri jastin trodoning Uyghurlar üchün qilghan ishliri xatire bolup qaldi

Kanada “Uyghur heqlirini qoghdash qurulushi” ning diréktori memet toxti ependi 1-ayning 7-küni féyisbuk hésabida élan qilghan uchurida, jastin trodo bilen 2024-yil 17-dékabir bille chüshken süritini hembehirligen hemde bu sabiq bash ministirning Uyghurlar üchün qilghan xizmitige alahide rehmet éytqan.

Kanada bash ministiri jastin trodo 10 ming Uyghurni kanadagha makanlashturush pirogrammisi (M62) ni qollap bélet tashlighan siyasiyon bolup, Uyghurlar mesilisige qoshqan ijabiy töhpisi kanadadiki Uyghurlar, jümlidin muhajirettiki Uyghurlarning maxtishigha sazawer bolup kelgenidi. Memet toxti ependi féyisbuk hésabida yollighan uchurida özining kanada “Uyghur heqlirini qoghdash qurulushi” gha hemde kanadaliq Uyghurlargha wakaliten sabiq bash ministir jastin trodogha bolghan minnetdarliqini bildürüp mundaq dep yazghan: “Men bash ministir jastin trodoning M62 pirogrammisigha tashlighan béliti, Uyghurlarni qet'iy qollighini, shundaqla her xil sorunlarda, jümlidin parlamént yighinlirida Uyghurlar mesilisini izchil otturigha qoyup kelgini üchün rehmet éytimen. Uning kelgüsi ishlirining ongushluq bolushini ümid qilimen”.

CNN Qatarliq xelq'ara taratqularning xewer qilishiche, kanada libérallar partiyesi rehbiri bolghan jastin trodo 9 yil kanada bash ministiri bolghan؛ 2025-yil 1-ayning 6-küni wezipisidin istépa bergenlikini élan qilghan bolup, hakimiyet béshidiki partiye rehbiri saylinip chiqqan haman, wezipisidin ayrilidiken.