Уйғур вәкили канада тәкшүрүш комитетида хитайниң уйғурларни паракәндә қилиши даимлиқ мәсилә икәнликини көрсәтти

Канаданиң чәт әлниң арилишишини тәкшүрүш комитети 27-март күнидин башлап шаһитларниң гуваһлиқини аңлашқа башлиған. Мәзкур комитетиниң 27-март чаршәнбә күни өткүзүлгән гуваһлиқ йиғинида канада “уйғур һәқлирини қоғдаш қурулуши” ниң директори мәмәт тохти гуваһлиқ берип, хитайниң канадада яшайдиған уйғур аммисини паракәндә қилишиниң даимлиқ мәсилә икәнликини билдүргән. “монтериял гезити” ниң хәвәр қилишичә, мәмәт тохти комитетта бәргән гуваһлиқида, канадалиқ уйғурларниң ‍аилиси билән болған ‍алақиси үзүп ташланғачқа уларниң әң хушаллиқ ишлириниму аилә әзалири билән ортақлишалмайдиғанлиқини ейтқан. “уйғур һәқлирини қоғдаш қурулуши” илгири хитай һөкүмитигә четишлиқ, дәп қаралған канададики бәзи шәхсләрниң бу комитетқа қатнаштурулғанлиқи сәвәблик униңдин чекинип чиққанлиқини елан қилған иди.

“монтериял гезити” ниң билдүрүшичә, мәмәт тохти 27-март күни бу комитетта бәргән гуваһлиқида, “сиз уларға хәтму әвәтәлмәйсиз, телефонму қилалмайсиз вә рәсимлириңизниму ортақлишалмайсиз” дегән. ‍У йәнә канададики бәзи уйғурларниң аилә әзалириниң өлүк яки тирикликидинму хәвири йоқлуқини билдүргән. Мәмәт тохти хитайниң канадалиқ уйғурларниң юртидики аилә әзалирини гөрүгә елиш арқилиқ уларға тәһдит салидиғанлиқи, буниңға өзиниң типик мисал болалайдиғанлиқини вә 2016-йилдин бери өз җәмәтидин 30 нәччә кишиниң тутқун қилинғанлиқини алаһидә әскәрткән.

Униң ейтишичә, 2023-йили йәрлик җ х тармақлири өзигә телефон қилип, униң аниси билән икки сиңлисиниң өлгәнликини, акисиниң йоқап кәткәнликини, тағисиниң дохтурханида икәнликини уқтурған. Униң тәкшүрүш комитетиға ейтишичә, мушу хил тәһдитләр түпәйлидин канададики нурғун уйғурлар өзлириниң әһвални сақчиға мәлум қилмаслиқ яки дәрдини ичигә ютушқа мәҗбур болған. Мәлум болушичә, шу күнки гуваһлиқ йиғинида канададики фалунгоң муритлири, шик (Sikhs), иран, рус аммиви тәшкилатлириниң вәкиллириму гуваһлиқ бәргән.