Канададики уйғурлар намайиш қилип, канада парламентини лагерлар мәсилисигә арилишишқа чақирди

Мухбиримиз әркин
2018-10-01
Елхәт
Пикир
Share
Принт

Канададики уйғурлар 1‏-өктәбир канада пайтәхти оттовада намайиш қилип, канада парламентини уйғурларниң вәзийитигә арилишишқа, хитайниң йиғивелиш лагерлирини тақап, уйғур тутқунларни қоюп беришигә бесим ишлитишкә чақирди.

Намайишқа канаданиң торонто, монтереал қатарлиқ шәһәрлиридә олтурушлуқ тәхминән 300 дәк уйғур келип қатнашқан. Намайишчилар канада парламентиға тәләп қоюп, хитайдин лагерларни тақашни, лагерлардики бир милйондәк уйғурни қоюп беришни, уйғур канада пуқралириниң аилә -тавабиатлириға вә уруқ - туғқанлириға паракәндичилик селишни тохтитишни тәләп қилишқа шундақла бу йолда дәрһал тәдбир қоллинишқа чақирған.

Оттовадики мәзкур намайиш хитай һөкүмити бир милйондәк уйғурни йиғивелиш лагерлириға қамапла қалмай, уларни мәхпий сотлап, ичкири өлкиләрдики түрмиләргә йөткәватқанлиқиға даир хәвәрләр тарқалған бир мәзгилдә елип берилди.

Хитай һөкүмити өткән һәптә уйғур аптоном районидин ичкиригә қатнайдиған йолучилар пойизиниң бир мәзгил тохтайдиғанлиқини елан қилған. Арқидинла лагердики уйғурларниң пойиз арқилиқ ичкири өлкиләргә йөткилидиғанлиқиға даир хәвәрләр тарқалған. Йәрлик даириләр өткән һәптә радийомизға 2 миң уйғурниң қәшқәрдики бир лагердин пойиз арқилиқ ичкиригә йөткәп кетилгәнликини дәлиллигән иди.

Шуниң билән бир вақитта йәнә ақсу ташйол идариси, куча наһийәлик қатнаш идариси, җ х идариси қатарлиқ органлар уқтуруш чүшүрүп, 217‏- номурлуқ майтағ-кучар ташйолида 30‏-сентәбирдин келәр йили 30 ‏-апрелғичә қатнаш тохтайдиғанлиқини елан қилған. Уқтурушта қатнашниң тәләмәт давиниға қелин қар йеғип кәткәнлики сәвәблик тохтайдиғанлиқи тәкитләнгән болсиму, лекин бу көзәткүчиләрдә «даириләр бу йол арқилиқ лагердики уйғурларни йөткәмду?» дегәндәк гуман пәйда қилған.

Оттовадики намайиш хитайниң 1‏-өктәбир «дөләт байрими» мунасивити билән дуняниң бир қисим дөләтлиридә өткүзүлгән шу хилдики намайиш вә наразилиқ паалийәтлириниң бир қисмидур.

Пикирләр (0)
Share
Толуқ бәт