Kanadadiki Uyghurlar namayish qilip, kanada parlaméntini lagérlar mesilisige arilishishqa chaqirdi

Muxbirimiz erkin
2018-10-01
Élxet
Pikir
Share
Print

Kanadadiki Uyghurlar 1‏-öktebir kanada paytexti ottowada namayish qilip, kanada parlaméntini Uyghurlarning weziyitige arilishishqa, xitayning yighiwélish lagérlirini taqap, Uyghur tutqunlarni qoyup bérishige bésim ishlitishke chaqirdi.

Namayishqa kanadaning toronto, montéré'al qatarliq sheherliride olturushluq texminen 300 dek Uyghur kélip qatnashqan. Namayishchilar kanada parlaméntigha telep qoyup, xitaydin lagérlarni taqashni, lagérlardiki bir milyondek Uyghurni qoyup bérishni, Uyghur kanada puqralirining a'ile -tawabi'atlirigha we uruq - tughqanlirigha parakendichilik sélishni toxtitishni telep qilishqa shundaqla bu yolda derhal tedbir qollinishqa chaqirghan.

Ottowadiki mezkur namayish xitay hökümiti bir milyondek Uyghurni yighiwélish lagérlirigha qamapla qalmay, ularni mexpiy sotlap, ichkiri ölkilerdiki türmilerge yötkewatqanliqigha da'ir xewerler tarqalghan bir mezgilde élip bérildi.

Xitay hökümiti ötken hepte Uyghur aptonom rayonidin ichkirige qatnaydighan yoluchilar poyizining bir mezgil toxtaydighanliqini élan qilghan. Arqidinla lagérdiki Uyghurlarning poyiz arqiliq ichkiri ölkilerge yötkilidighanliqigha da'ir xewerler tarqalghan. Yerlik da'iriler ötken hepte radiyomizgha 2 ming Uyghurning qeshqerdiki bir lagérdin poyiz arqiliq ichkirige yötkep kétilgenlikini delilligen idi.

Shuning bilen bir waqitta yene aqsu tashyol idarisi, kucha nahiyelik qatnash idarisi, j x idarisi qatarliq organlar uqturush chüshürüp, 217‏- nomurluq maytagh-kuchar tashyolida 30‏-séntebirdin kéler yili 30 ‏-aprélghiche qatnash toxtaydighanliqini élan qilghan. Uqturushta qatnashning telemet dawinigha qélin qar yéghip ketkenliki seweblik toxtaydighanliqi tekitlen'gen bolsimu, lékin bu közetküchilerde "Da'iriler bu yol arqiliq lagérdiki Uyghurlarni yötkemdu?" dégendek guman peyda qilghan.

Ottowadiki namayish xitayning 1‏-öktebir "Dölet bayrimi" munasiwiti bilen dunyaning bir qisim döletliride ötküzülgen shu xildiki namayish we naraziliq pa'aliyetlirining bir qismidur.

Toluq bet