Канада хәвпсизлик истихбарат идариси иштин бошитилған хитай инженерларниң хитай һөкүмити үчүн ишлигәнликини җәзмләштүргән

“дөләт почтиси” гезитиниң хәвәр қилишичә, канада хәвпсизлик истихбарат идариси (CSIS) канададики сәзгүр органлардин бири болған микро биологийә тәҗрибиханисида ишлигән вә кейин иштин бошитилған чю шяңгу вә униң ери чең кедиң һәққидә нәччә йүз бәтлик доклат елан қилип, уларниң хитай һөкүмити үчүн ишлигәнликини җәзмләштүргән.

Бу бир җүп әр-аял 2019-йили тәҗрибиханидин қоғлап чиқирилған вә 2021-йили рәсмий һалда иштин бошитилғаникән.

28-Феврал күни елан қилинған доклатта көрситилишичә, чю шяңгу хитайниң һәр қайси органлири билән чоңқур һәмкарлиқ мунасивити орнатқан һәмдә хитай һөкүмитиниң мәнпәәти үчүн мәқсәтлик вә йошурун һалда уларға тәтқиқат материяллирини вә мәлуматларни йәткүзгән.

Канада хәвпсизлик истихбарат идарисиниң байқишичә, чю шяңгу хитай һөкүмитиниң чәт әлләрдики муһим орунларда ишләйдиған хитай ихтисас игилирини байқашни мәқсәт қилған “миң ихтисаслиқлар программиси” ға илтимас сунуп, қобул қилинғаникән.

Техи йеқинда, америка федератсийә тәкшүрүш идариси гоң чиңгуаң исимлик хитай инженерни америка һөкүмити үчүн ясап чиқилған ядролуқ башқурулидиған бомба қоюп беришни байқаш, баллистик вә аваздин тез учидиған башқурулидиған бомбини из қоғлаш қатарлиқ аләм бошлуқи системисида ишлитилидиған техника лайиһәлирини оғрилаш җинайити билән әйибләп қолға алғаниди. Даириләр бу хитай инженериниңму 2014-2022-йиллири арисида хитайниң “ихтисаслиқлар программиси” ға бир қанчә қетим илтимас сунғанлиқини вә хитайға бир қанчә қетим барғанлиқини байқиған.