Kanada xewpsizlik istixbarat idarisi ishtin boshitilghan xitay inzhénérlarning xitay hökümiti üchün ishligenlikini jezmleshtürgen

“Dölet pochtisi” gézitining xewer qilishiche, kanada xewpsizlik istixbarat idarisi (CSIS) kanadadiki sezgür organlardin biri bolghan mikro bi'ologiye tejribixanisida ishligen we kéyin ishtin boshitilghan chyu shyanggu we uning éri chéng kéding heqqide nechche yüz betlik doklat élan qilip, ularning xitay hökümiti üchün ishligenlikini jezmleshtürgen.

Bu bir jüp er-ayal 2019-yili tejribixanidin qoghlap chiqirilghan we 2021-yili resmiy halda ishtin boshitilghaniken.

28-Féwral küni élan qilin'ghan doklatta körsitilishiche, chyu shyanggu xitayning her qaysi organliri bilen chongqur hemkarliq munasiwiti ornatqan hemde xitay hökümitining menpe'eti üchün meqsetlik we yoshurun halda ulargha tetqiqat matériyallirini we melumatlarni yetküzgen.

Kanada xewpsizlik istixbarat idarisining bayqishiche, chyu shyanggu xitay hökümitining chet ellerdiki muhim orunlarda ishleydighan xitay ixtisas igilirini bayqashni meqset qilghan “Ming ixtisasliqlar programmisi” gha iltimas sunup, qobul qilin'ghaniken.

Téxi yéqinda, amérika fédératsiye tekshürüsh idarisi gong chinggu'ang isimlik xitay inzhénérni amérika hökümiti üchün yasap chiqilghan yadroluq bashqurulidighan bomba qoyup bérishni bayqash, ballistik we awazdin téz uchidighan bashqurulidighan bombini iz qoghlash qatarliq alem boshluqi sistémisida ishlitilidighan téxnika layihelirini oghrilash jinayiti bilen eyiblep qolgha alghanidi. Da'iriler bu xitay inzhénériningmu 2014-2022-yilliri arisida xitayning “Ixtisasliqlar programmisi” gha bir qanche qétim iltimas sun'ghanliqini we xitaygha bir qanche qétim barghanliqini bayqighan.