Канада һөкүмити өз пуқралирини хитайдин қоғдашқа чақирилди

Мухбиримиз әзиз
2020-05-13
Share

Канада пуқраси болған һүсәнҗан җелил 1999-йили өзбекистан сәпиридә қолға елинип хитайға өткүзүп берилгәндин буян, хитай һөкүмитиниң түрлүк баһаниләр билән канада пуқралирини қолға елиш қилмиши көп қетимлап йүз бәргәниди. 13-Май күни канададики «ванкувер қуяши» гезити мәхсус мақалә елан қилип, хитайниң канада пуқралириға қорққақ селиш вә паракәндичилик селиш қилмишлириға қарита кәскин чарә қоллиниши лазимлиқини йәнә бир қетим канада һөкүмитигә әсләтти.

Хәвәрдә көрситилишичә, канада пуқраси болуп әркин дөләттә яшаш һоқуқиға еришкән бир түркүм уйғур вә тибәт кишилик һоқуқ паалийәтчилири һәмдә өктичи пикирдикиләр йеқинқи бирнәччә йилда көп қетимлап хитай һөкүмитиниң тәһдитлиригә вә паракәндә қилишиға дуч кәлмәктикән. Буниңда хитай сақчилири бәзи кишиләргә йерим кечидә телефон қилип уларниң аилә әзалириниң еғир келишмәсликкә дуч келиш алдида туруватқанлиқини ейтса, йәнә бәзилиридә улар шу җайдики хитай әлчиханиси яки консулханисиға берип өзлирини мәлум қилишқа буйрулған.

Канададики уйғур муһаҗирлиридин мәмәт тохти, дилнур әнвәр қатарлиқлар мана мушу хилдики тәһдитләргә көп қетим учриғанлар болуп, бу хилдики тәһдитләр хуавей гуруһиниң муавин рәиси миң вәнҗуни 2018-йили канада һөкүмити рәсмий тутқун қилғандин кейин техиму әвҗ алған. Бир қисим канада пуқралири хитайда қолға елинған вә түрмигә ташланған.

Һалбуки мақалида алаһидә тәкитләнгән йәнә бир әһвал уйғурлар, тибәтләр, тәйвәнликләр вә хоңкоң демократчилириниң канада туприқидики паалийәтлири көп қетимлап бейҗиңпәрәс кишиләрниң ашкара һалда иҗазәтсиз сүрәткә тартиши, топлишип һәйвә көрситиши, һәтта қоллирини йүзлиригә тәгкүзүп туруп тәһдит селишиға дуч кәлгән. Әмма бу хил паалийәтләрдә бу хилдики хитайпәрәс кишиләрниң һәрқачан тәртиплик тәшкилләнгән кишиләр икәнлики мана мән, дәпла көрүнүп қалған.

Мақалида мушу әһвалларни омумлаштуруп, мустәқил вә игилик һоқуқиға игә бир дөләт болған канада «нөвәттә вирусниң балайиапәтлиридин халас болушқа алдираватқанда хитай билән сән-пән дейишип қелишса яхши болмайду. Әмма немә үчүн канада пуқралириға чәтәл һөкүмитиниң ашу тәрздә тәһдит селишиға қарита күчлүк бир қоғдиниш тәдбири алмайду?» дәп соал қойиду. Шундақла канада сиясийонлирини хитай һөкүмити әмәс, бәлки канада хәлқи сайлап чиққанлиқини, шу сәвәбтин уларниң хәлққә җавабкар болуш мәҗбурийни барлиқини алаһидә әскәртиду.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.