Канададики 68 парламинет әзаси бирлишип, канада һөкүмитини хитайға җаза йүргүзүшкә чақириқ қилди

Мухбиримиз нуриман
2020-07-15
Елхәт
Пикир
Share
Принт

Канада радио ширкити (CBC) ториниң 15-июл бәргән хәвиригә асасланғанда, канададики 68 нәпәр парламент әзаси бирлишип, канада баш министириға тәләпнамә сунған. Тәләпнамидә канаданиң уйғур мусулманлири вә хоңкоңдики демократийәни тәшәббус қилғучиларға қилиниватған кишилик һоқуқ дәпсәндичиликигә қарита хитайниң юқири дәриҗилик әмәлдарлириға җаза йүргүзүши тәләп қилинған.

Бу бирләшмә тәләпнамидә оттаваниң «йәр шари магнитский қануни» дин пайдилинип, уйғур вә хоңкоңдики демократийә тәләп қилғучиларни бастуруватқан хитай коммунист әмәлдарлирини җазалаш нишанға елиши керәклики оттуриға қоюлған.

Парламент әзаси җон мәкәй CBC хәвәр ториниң зияритини қобул қилғанда, канаданиң хитай һөкүмитиниң уйғур хәлқини пүтүн милләт сүпитидә қул қилишиға вә лагерларға солап зиянкәшлик қелишиға сүкүт қилип турса болмайдиғанлиқини билдүргән. У йәнә канада һөкүмитиниң хитай һазирғичә тутуп туруватқан канада пуқралирини қутқузушта пассип вә аста һәрикәт қиливатқанлиқини әйиблигән.

Мәлумки, канада пуқраси һүсәйин җелил йиллардин буян хитай түрмисидә азаб чәкмәктә. Униңдин башқа канадалиқ сабиқ дипломат майкол ковриг билән содигәр майкел спавор 2018-йили 12-айдин башлап хитайда тутуп турулмақта. Парламент әзаси җон мәкәй канада һөкүмитиниң өз пуқралириға игә чиқишини, хитайға дипломатик бесим ишлитип, хитай түрмисидики канада пуқралирини қутқузуши керәкликини тәкитләп өткән.

Пикирләр (0)
Share
Толуқ бәт