Канада баш министири билән хитай рәһбәрлириниң кишилик һоқуқ сөһбити наһайити мүшкүлгә тохтиған

Мухбиримиз әркин
2016-09-02
Елхәт
Пикир
Share
Принт

Канада баш министири җастин тередо хитай рәһбәрлири билән өткүзгән кишилик һоқуқ сөһбити мүшкүлгә тохтиғанлиқини билдүргән. Тередо бу сөзни пәйшәнбә күни шаңхәйдә сода саһәсидикиләргә нутуқ сөзлигәндә тәкитлигән.

У, хитай рәиси ши җинпиң вә баш министиери ли кечяң билән көрүшкәндә охшимиған пикирләргә йол қоюш хитайни күчәйтиду, дегәнликини билдүргән. Канада баш министири бу сәпиридә хитай билән қиммити 1 милярд 200 милйон канада доллирилиқ 56 хил сода келишими имзалиған иди.

Тередо шаңхәйдә сөзлигән нутқида, «мән һәр биригә канада ипадә әркинлики вә адил башқурушниң пайдисини көргән дөләт икәнликини хатириләттим. Канада хитайни кишилик һоқуқни алға сүрүш вә қоғдашта техиму көп ишларни қилишқа риғбәтләндүрди » дегән. У йәнә, « бу сөһбәтниң унчилик асанға тохтимайдиғанлиқини билсәмму, буни сөзлишиш бир зөрүрийәт иди» дәп тәкитлигән.

Җастин тередониң хитай зиярити 30‏-авғуст башланған. У зиярәткә чиқиш алдида канада кишилик һоқуқ тәшкилатлириниң хитай түрмисидики канада пуқраси кәвин гарит билән һүсәнҗан җелилни қайтуруп келиш һәққидики күчлүк бесимиға учриған.

Канада һөкүмити 2006‏-йили хитай һөкүмити тәрипидин «террорлуқ» билән әйиблинип муддәтсиз қамақ җазасиға һөкүм қилинған һүсәнҗан җелил билән буниңдин 2 йил аввал җасуслуқ билән әйиблинип қолға елинған кәвин гаритни қутқузушқа йетәрлик күч чиқармиди, дәп әйиблинип кәлгән иди.

Пикирләр (0)
Share
Толуқ бәт