Хитай һөкүмити канада пуқраси кәвин гаретниң «қанун бойичә» қоюп берилгәнликини билдүрди

Мухбиримиз әркин
2016-09-16
Елхәт
Пикир
Share
Принт

Хитай һөкүмити буниңдин икки йил аввал җасуслуқ билән әйиблинип қолға елинған канада пуқраси кәвин гаретниң «қанун бойичә» қоюп берилгәнликини билдүрди.

Хитай ташқи ишлар министирлиқиниң җүмә күни бирләшмә агентлиқиға билдүрүшичә, кәвин гаретниң «барлиқ қануний һоқуқлириға толуқ капаләтлик қилинған, канада тәрәпниң дипломатик мулазимәт һоқуқиға толуқ һөрмәт қилинған һәм әмәл қилинған.»

Кәвин гарет 2014‏-йили аяли җулийә гарет билән хитайниң шималий корейә чеграсидики дәндуң шәһиридә қолға елинған. Униң аяли капаләткә қоюп берилгән болсиму, әмма униң өзи давамлиқ тутуп қелинған иди.
Әр-аял гаретлар 1984‏-йилдин бери дәндуңда «қәһвәхана» ечип, шимали корейә мусапирлириға ярдәм қилип кәлгән.

Хитай ахбаратиниң ашкарилишичә, дәндуң сот мәһкимиси сәйшәнбә күни униңға һөкүм елан қилип, униң чеградин чиқип кетишигә йол қоюшни буйруған. Әмма даириләр, сотниң қандақ һөкүм чиқарғанлиқини ашкарилашни рәт қилған.

Кәвин гаретниң канада баш министири җастин тередониң йеқинда хитайға қилған зияритидин кейинла қоюп берилиши диққәт қозғиди. Тередо хитайға сәпәр қилиш һарписида канада кишилик һоқуқ тәшкилатлириниң хитай түрмисидики кәвин гарет, һүсәнҗан җелил қатарлиқ тутқунларни қайтуруп келиш һәққидики қаттиқ бесимиға учриған иди.

Кәвин гаретниң аилиси пәйшәнбә күни баянат елан қилип, «гарет аилиси униңға көңүл бөлгән, униң үчүн дуа қилғанларға, шуниң билән биргә, униң қоюп берилишигә күч чиқарған һәр бир кишигә рәһмитини билдүриду» дегән.

Пикирләр (0)
Share
Толуқ бәт