Jastin trudo: "Kanada emdi xitayning diplomatiye zorawanliqigha boyun egmeydu"

Muxbirimiz irade
2020-10-15
Share

Kanada bash ministiri jastin trudo kanadaning emdi xitayning diplomatiye zorawanliqigha, kishilik hoquqni xalighanche depsende qilishigha süküt qilmaydighanliqini bildürgen.

Kanadaning "Yershari we pochta" gézitining xewer qilishiche, kanada bash ministiri jastin trudo yuqiriqi sözlerni "Kanada-xitay diplomatik munasiwet ornatqanliqining 50 yilliqi" ni xatirilesh munasiwiti bilen qilghan sözide éytqan iken.

Jastin trudo sözide yene "Xalighanche qolgha élish, xongkong démokratiyesini basturush we musulman az sanliq milletlirini lagérlargha qamash" qatarliq wasitiler hergizmu "Ijabiy chiqish yoli emes" dep xitayni agahlandurghan. U yene kanadaning bundin kéyin shérik döletler bilen zich hemkarliship, xitay hökümitining "Mejburlash diplomatiyisi" ge taqabil turidighanliqini bildürgen. U sözide xitay teripidin görüge éliwélin'ghan ikki neper kanada puqrasining mesilisinimu tilgha alghan.

Bu hazirghiche xitayni ochuq-ashkara tenqid qilishta ikkilinip kelgen kanada bash ministirining tunji qétim xitayni Uyghur élidiki lagérlar mesilisi we xongkong mesiliside bundaq ochuq we keskin halda tenqid qilishi bolup hésablinidiken.

U shu künidiki sözide yene mundaq dégen: "Xitay hazir dunyadiki ikkinchi chong iqtisadiy gewde bolup, kanada qatarliq bashqa döletlerge körünerlik iqtisadiy tesiri bar. Hökümitimiz béyjing bilen bolghan sodining dawam qilishini ümid qilsimu, emma derijidin tashqiri chong kommunist réjimgha munasiwetlik kishilik hoquq mesiliside süküt qilmaydu. Biz dunyaning herqaysi jayliridiki oxshash pikirdiki döletler bilen dawamliq hemkarliship, xitaygha uning ichki ishlar we yer shari ishlirigha tutqan pozitsiyisining xitayning özi üchün we hemmimiz üchün ijabiy yol emeslikini bildürimiz."

Roytérs agéntliqining xewer qilishiche, xitay tashqi ishlar ministirliqi 14-öktebir küni kanada bash ministirining sözlirige naraziliq bildürgen. Xitay tashqi ishlar ministirliqining bayanatchisi jaw lijyen kanada hökümitini "Yalghanchiliq qildi" dep eyibligen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet