Канада парламент әзалири һөкүмәтни хитайниң уйғурларға салған зулумини “ирқий қирғинчилиқ”, дәп етирап қилишқа чақирған

Канада парламент әзалири канада федератсийә һөкүмитини хитайниң уйғурларни җаза лагерлириға қамиши, мәҗбурий туғмас қилишини ирқий қирғинчилиқ, инсанийәткә қарши җинайәт, дәп елан қилишқа чақирған. Канададики “йәр шари почтиси” гезитиниң хәвәр қилишичә, канада консерватиплар партийәсидин болған парламент әзаси гарнет гениюс билән майкел чоң 24-январ баянат елан қилип, канада һөкүмитиниң “шинҗаңдики уйғур вә башқа аз санлиқ милләтләргә ирқий қирғинчилиқ йүргүзүлүватқанлиқини рәсмий етирап қилиши” ни тәләп қилған.

Улар баянатида, уйғурлар дуч келиватқан “ирқий қирғинчилиқниң системилиқ нопус контроли, җинсий зораванлиқ вә кәң көләмлик тутқунни өз ичигә алидиғанлиқи” ни билдүргән. Авам палата әзаси майкел чоң консерватипларниң авам палатасида хитайниң уйғурларға тутқан муамилисини ирқий қирғинчилиқ, дәп етирап қилиш тоғрисида тәклип лайиһәси сунидиғанлиқини билдүргән. Улар хитайниң ирқий қирғинчилиқ садир қилғанлиқини сабиқ америка ташқи ишлар министири помпейо етирап қилипла қалмай, байден һөкүмитиниң ташқи ишлар министири антони блинкенниңму етирап қилғанлиқини ейтқан.

Канада парламенти авам палатасиниң кишилик һоқуқ комитети өткән йили хитайниң уйғурларға қарита ирқий қирғинчилиқ йүргүзүватқанлиқини елан қилған болсиму, лекин баш министир теридониң канада һөкүмити буниңға ипадә билдүрүшни рәт қилған. “йәршари почтиси” гезитиниң ейтишичә, гарнет гениюс билән майкел чоң консерватиплар партийәсиниң һөкүмәтни “байден мәмурийитигә қошулуп, уйғурларға қаритилған ирқий қирғинчилиқни рәсмий етирап қилишқа, шуниңдәк башқа иттипақдашлириниму буниңға риғбәтләндүрүп, бу қирғинчилиққа қарши тәң һәрикәт қилишқа чақиридиғанлиқи” ни билдүргән.