Kanada parlamént ezaliri hökümetni xitayning Uyghurlargha salghan zulumini “Irqiy qirghinchiliq”, dep étirap qilishqa chaqirghan

Kanada parlamént ezaliri kanada fédératsiye hökümitini xitayning Uyghurlarni jaza lagérlirigha qamishi, mejburiy tughmas qilishini irqiy qirghinchiliq, insaniyetke qarshi jinayet, dep élan qilishqa chaqirghan. Kanadadiki “Yer shari pochtisi” gézitining xewer qilishiche, kanada konsérwatiplar partiyesidin bolghan parlamént ezasi garnét géniyus bilen maykél chong 24-yanwar bayanat élan qilip, kanada hökümitining “Shinjangdiki Uyghur we bashqa az sanliq milletlerge irqiy qirghinchiliq yürgüzülüwatqanliqini resmiy étirap qilishi” ni telep qilghan.

Ular bayanatida, Uyghurlar duch kéliwatqan “Irqiy qirghinchiliqning sistémiliq nopus kontroli, jinsiy zorawanliq we keng kölemlik tutqunni öz ichige alidighanliqi” ni bildürgen. Awam palata ezasi maykél chong konsérwatiplarning awam palatasida xitayning Uyghurlargha tutqan mu'amilisini irqiy qirghinchiliq, dep étirap qilish toghrisida teklip layihesi sunidighanliqini bildürgen. Ular xitayning irqiy qirghinchiliq sadir qilghanliqini sabiq amérika tashqi ishlar ministiri pompéyo étirap qilipla qalmay, baydén hökümitining tashqi ishlar ministiri antoni blinkénningmu étirap qilghanliqini éytqan.

Kanada parlaménti awam palatasining kishilik hoquq komitéti ötken yili xitayning Uyghurlargha qarita irqiy qirghinchiliq yürgüzüwatqanliqini élan qilghan bolsimu, lékin bash ministir téridoning kanada hökümiti buninggha ipade bildürüshni ret qilghan. “Yershari pochtisi” gézitining éytishiche, garnét géniyus bilen maykél chong konsérwatiplar partiyesining hökümetni “Baydén memuriyitige qoshulup, Uyghurlargha qaritilghan irqiy qirghinchiliqni resmiy étirap qilishqa, shuningdek bashqa ittipaqdashlirinimu buninggha righbetlendürüp, bu qirghinchiliqqa qarshi teng heriket qilishqa chaqiridighanliqi” ni bildürgen.