Канада һөкүмити уйғур канада пуқралирини уйғур елидә зиярәттә болмаслиққа агаһландурди

Мухбиримиз әркин
2021.04.12

Канада һөкүмити 11-апрел хитайға саяһәткә баридиған канадалиқларға шинҗаң тоғрисида агаһландуруш берип, уйғур ели билән етник мунасивити болған канадалиқларниң “тутқун қилиниш хәвпи” гә дуч келиши мумкинликини билдүргән. Бу агаһландурушниң хитай даирилири өткән һәптә ахбарат йиғини өткүзүп, чәтәлдики уйғурларни шинҗаңда хатирҗәм зиярәттә болушқа чақиришиниң арқисидинла елан қилиниши диққәт қозғиди.

Канада һөкүмити ториниң саяһәт мәслиһәти бетидики бурун елан қилинған учурида, саяһәтчиләргә уйғур елидә “қораллиқ сақчиларни көрүшниң нормал” икәнлики, даириләрниң “аз санлиқ милләтләрни тутқун қилишни барғансери күчәйтиватқанлиқи”, “канада пуқралириниң хитай гираждани болған аилә әзалириниң тутқун қилинғанлиқи” билдүрүлгәниди.

Канададики CTV хәвәлиридә ейтилишичә, канада һөкүмитиниң 11-апрел елан қилинған учурида уйғур елиниң вәзийити техиму тәпсилий шәрһлинип, йиғивелиш лагерлири һәққидә тохталған һәм “әгәр мәзкур район билән етник бағлиниши болған канадалиқлар бу районни зиярәт қилса тутқун қилиниш хәвпи барлиқи” ни билдүргән.

Учурда “әгәр сизниң шинҗаң уйғур аптоном райони билән аиливи яки етник бағлинишиңиз болса халиғанчә тутқун қилиниш хәвпигә дуч келишиңиз мумкин” дейилгән. Бу канада һөкүмитиниң тунҗи қетим уйғур канада гиражданлирини уйғур елидә саяһәттә болмаслиққа ениқ агаһландурушидур.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.