Kanada hökümiti Uyghur kanada puqralirini Uyghur élide ziyarette bolmasliqqa agahlandurdi

Kanada hökümiti 11-aprél xitaygha sayahetke baridighan kanadaliqlargha shinjang toghrisida agahlandurush bérip, Uyghur éli bilen étnik munasiwiti bolghan kanadaliqlarning “Tutqun qilinish xewpi” ge duch kélishi mumkinlikini bildürgen. Bu agahlandurushning xitay da'iriliri ötken hepte axbarat yighini ötküzüp, chet'eldiki Uyghurlarni shinjangda xatirjem ziyarette bolushqa chaqirishining arqisidinla élan qilinishi diqqet qozghidi.

Kanada hökümiti torining sayahet mesliheti bétidiki burun élan qilin'ghan uchurida, sayahetchilerge Uyghur élide “Qoralliq saqchilarni körüshning normal” ikenliki, da'irilerning “Az sanliq milletlerni tutqun qilishni barghanséri kücheytiwatqanliqi”, “Kanada puqralirining xitay girazhdani bolghan a'ile ezalirining tutqun qilin'ghanliqi” bildürülgenidi.

Kanadadiki CTV xeweliride éytilishiche, kanada hökümitining 11-aprél élan qilin'ghan uchurida Uyghur élining weziyiti téximu tepsiliy sherhlinip, yighiwélish lagérliri heqqide toxtalghan hem “Eger mezkur rayon bilen étnik baghlinishi bolghan kanadaliqlar bu rayonni ziyaret qilsa tutqun qilinish xewpi barliqi” ni bildürgen.

Uchurda “Eger sizning shinjang Uyghur aptonom rayoni bilen a'iliwi yaki étnik baghlinishingiz bolsa xalighanche tutqun qilinish xewpige duch kélishingiz mumkin” déyilgen. Bu kanada hökümitining tunji qétim Uyghur kanada girazhdanlirini Uyghur élide sayahette bolmasliqqa éniq agahlandurushidur.