Kanadadiki chérkawlar Uyghur qirghinchiliqi heqqide hökümetke bésim peyda qilmaqta

• Muxbirimiz eziz
  2021-08-03

Xitay hökümitining Uyghurlarni basturush herikitini eyiblewatqanlar arisida diniy jama'et barghanséri muhim salmaqni igilimekte. Kanadadiki “Yershari we pochta géziti” ning 2-awghusttiki xewiride éytilishiche, nöwette kanada teweside Uyghur qirghinchiliqi barghanséri köp kishilerge melum bolushqa bashlighan. Netijide yéqindin buyan herqaysi jaylardiki chérkawlar kanada hökümitini “Uyghur qirghinchiliqi” ni étirap qilishqa chaqiriq qilishni bashliwetken.

Xewerde éytilishiche, chérkawlardiki diniy jama'et xitay hökümitining Uyghurlardiki diniy étiqadni bahane qilip Uyghurlarni térrorluq we esebiylikke baghlishi, shundaqla lagérlargha qamishidin bekmu ghezeplen'gen. Xitay hökümitining “Islam dinini xitaychilashturush” sho'ari bolsa ulargha xitay hökümitining diniy étiqadni yoqitishtek heqiqiy gherizini ashkarilap bergen. Buning bilen herqaysi jaylarda chérkawlar musulmanlar jama'iti bilen birlikte muraji'etname teyyarlap kanada hökümitige ewetken hemde ularni tézrek “Uyghur qirghinchiliqi” heqqide qarar élishqa ündigen.

Melum bolushiche, kanada parlaménti Uyghur qirghinchiliqi heqqide resmiy qarar alghan bolsimu, biraq hökümet bu heqte téxiche qarar chiqarmighaniken. Kanada parlaménti awam palatasining ezasi garnét jényus ependi bu heqte muxbirlarning ziyaritini qobul qilip “Kanada hökümitining Uyghur qirghinchiliqini étirap qilishini qolgha keltürüsh bizning nöwettiki eng chong wezipimiz” dégen.