ئۇيغۇرلار مەسىلىسى كانادا-خىتاي مۇناسىۋىتىدىكى مۇھىم تېمىلاردىن بولۇپ قالماقتا

مۇخبىرىمىز ئەزىز
2020-09-04
ئېلخەت
پىكىر
Share
پرىنت

خىتاي ھۆكۈمىتىنىڭ ئۇيغۇر دىيارىدىكى سىياسىي باستۇرۇش ھەرىكەتلىرى خەلقئارادا بارغانسېرى «قىرغىنچىلىق» دەپ ئەيىبلىنىۋاتقاندا، كانادا ھۆكۈمىتىنىڭ خىتاي بىلەن تۈرلۈك مۇناسىۋىتىدە ئۇيغۇرلار مەسىلىسى يېڭىۋاشتىن ئورۇن ئېلىشقا باشلىغان.

«سادبۇرىي چولپىنى» گېزىتىنىڭ 3-سېنتەبىردىكى خەۋىرىدە ئېيتىلىشىچە، كانادا پارلامېنت ئەزاسى گارنېت جىنيەس يېقىندا كانادا-خىتاي مۇناسىۋىتى ھەققىدىكى خىزمەت بىلەن شۇغۇللانغۇچى مەخسۇس كومىتېتتقا خىزمەتكە چۈشكەن. مەزكۇر كومىتېتنىڭ قۇرۇلۇشى ھەققىدە ھۆكۈمەت تورىدا ئېنىق قىلىپ: «خىتاي بىلەن بولغان ئۇزۇن مەزگىللىك دىپلوماتىيە كرىزىسى تۈپەيلىدىن بۇ كومىتېت تەشكىل قىلىندى،» دېيىلگەن. گارنېت جىنيەس بۇ جايدىكى خىزمىتى ھەققىدە سۆز قىلغاندا ئۇيغۇرلار مەسىلىسىنى ئالاھىدە تەكىتلىگەن. ئۇ بۇ ھەقتە سۆز قىلىپ: «يېقىندىن بۇيان بىز ئاساسىي دىققىتىمىزنى شەرقىي تۈركىستان ياكى شىنجاڭ دەپ ئاتىلىدىغان ئاشۇ جايدىكى ئۇيغۇرلارغا قارشى قىرغىنچىلىق قىلمىشىغا قارىتىۋاتىمىز،» دېگەن.

گارنېت جىنيەس بۇ ھەقتىكى نۇتقىدا ئېنىق قىلىپ: «شەرقىي تۈركىستاندا بولۇۋاتقان ئىشلار قىرغىنچىلىقنىڭ بارلىق تەبىرلىرىگە تولۇق چۈشىدۇ،» دەپ كۆرسەتكەن ھەمدە كانادا ھۆكۈمىتىنى مەزكۇر قىرغىنچىلىقنى ئېتىراپ قىلىشقا چاقىرغان. شۇنىڭدەك ئۇيغۇر دىيارىدىكى مەجبۇرىي ئەمگەككە چېتىشلىق تەمىنات زەنجىرى ھەققىدە ئالاھىدە توختىلىپ: «بىز ئۆزىمىز ئىستېمال قىلىۋاتقان ھەمدە خىتايدىن ئىمپورت قىلىۋاتقان مەھسۇلاتلارنىڭ ‹زامانىۋى قۇللار ئەمگىكى› نىڭ مەھسۇلى ئىكەنلىكىنى ئۇنتۇپ قالماسلىقىمىز لازىم،» دېگەن.

پىكىرلەر (0)
Share
تولۇق بەت