Уйғурлар мәсилиси канада-хитай мунасивитидики муһим темилардин болуп қалмақта

Мухбиримиз әзиз
2020-09-04
Елхәт
Пикир
Share
Принт

Хитай һөкүмитиниң уйғур дияридики сиясий бастуруш һәрикәтлири хәлқарада барғансери «қирғинчилиқ» дәп әйиблиниватқанда, канада һөкүмитиниң хитай билән түрлүк мунасивитидә уйғурлар мәсилиси йеңиваштин орун елишқа башлиған.

«Садбурий чолпини» гезитиниң 3-сентәбирдики хәвиридә ейтилишичә, канада парламент әзаси гарнет җинйәс йеқинда канада-хитай мунасивити һәққидики хизмәт билән шуғулланғучи мәхсус комитеттқа хизмәткә чүшкән. Мәзкур комитетниң қурулуши һәққидә һөкүмәт торида ениқ қилип: «хитай билән болған узун мәзгиллик дипломатийә кризиси түпәйлидин бу комитет тәшкил қилинди,» дейилгән. Гарнет җинйәс бу җайдики хизмити һәққидә сөз қилғанда уйғурлар мәсилисини алаһидә тәкитлигән. У бу һәқтә сөз қилип: «йеқиндин буян биз асасий диққитимизни шәрқий түркистан яки шинҗаң дәп атилидиған ашу җайдики уйғурларға қарши қирғинчилиқ қилмишиға қаритиватимиз,» дегән.

Гарнет җинйәс бу һәқтики нутқида ениқ қилип: «шәрқий түркистанда болуватқан ишлар қирғинчилиқниң барлиқ тәбирлиригә толуқ чүшиду,» дәп көрсәткән һәмдә канада һөкүмитини мәзкур қирғинчилиқни етирап қилишқа чақирған. Шуниңдәк уйғур дияридики мәҗбурий әмгәккә четишлиқ тәминат зәнҗири һәққидә алаһидә тохтилип: «биз өзимиз истемал қиливатқан һәмдә хитайдин импорт қиливатқан мәһсулатларниң ‹заманиви қуллар әмгики' ниң мәһсули икәнликини унтуп қалмаслиқимиз лазим,» дегән.

Пикирләр (0)
Share
Толуқ бәт