Uyghurlar mesilisi kanada-xitay munasiwitidiki muhim témilardin bolup qalmaqta

Muxbirimiz eziz
2020-09-04
Élxet
Pikir
Share
Print

Xitay hökümitining Uyghur diyaridiki siyasiy basturush heriketliri xelq'arada barghanséri "Qirghinchiliq" dep eyibliniwatqanda, kanada hökümitining xitay bilen türlük munasiwitide Uyghurlar mesilisi yéngiwashtin orun élishqa bashlighan.

"Sadburiy cholpini" gézitining 3-séntebirdiki xewiride éytilishiche, kanada parlamént ezasi garnét jinyes yéqinda kanada-xitay munasiwiti heqqidiki xizmet bilen shughullan'ghuchi mexsus komitéttqa xizmetke chüshken. Mezkur komitétning qurulushi heqqide hökümet torida éniq qilip: "Xitay bilen bolghan uzun mezgillik diplomatiye krizisi tüpeylidin bu komitét teshkil qilindi," déyilgen. Garnét jinyes bu jaydiki xizmiti heqqide söz qilghanda Uyghurlar mesilisini alahide tekitligen. U bu heqte söz qilip: "Yéqindin buyan biz asasiy diqqitimizni sherqiy türkistan yaki shinjang dep atilidighan ashu jaydiki Uyghurlargha qarshi qirghinchiliq qilmishigha qaritiwatimiz," dégen.

Garnét jinyes bu heqtiki nutqida éniq qilip: "Sherqiy türkistanda boluwatqan ishlar qirghinchiliqning barliq tebirlirige toluq chüshidu," dep körsetken hemde kanada hökümitini mezkur qirghinchiliqni étirap qilishqa chaqirghan. Shuningdek Uyghur diyaridiki mejburiy emgekke chétishliq teminat zenjiri heqqide alahide toxtilip: "Biz özimiz istémal qiliwatqan hemde xitaydin import qiliwatqan mehsulatlarning 'zamaniwi qullar emgiki' ning mehsuli ikenlikini untup qalmasliqimiz lazim," dégen.

Toluq bet