Америка чәклигән хитай шеркитиниң канадада йиғинға тәклип қилиниши уйғурларниң тәнқидигә учриди

Америкада” қара тизимлик “кә елинған хитай техника шеркитиниң канададики бир йиғинға тәклип қилиниши уйғур паалийәтчилириниң наразилиқиға учриди.

“CBC хәвәрлири” ниң хәвәр қилишичә, америка-канада арисидики тиҗарий мунасивәтләргә алақидар “хитай мунбири” йиғини канададики “беританийә коломбийәси университети” ға қарашлиқ бир тиҗарәт кулуби тәрипидин уюштурулған болуп, улар бу йиғинға хитай һөкүмитиниң уйғурларни назарәт қилишида рол алғанлиқи үчүн америка һөкүмити тәрипидин қара тизимликкә елинған “сәзгүр чағ” (“SenseTime”) шеркитиниң дериктори җиммий җовни тәклип қилған. Мәзкур йиғинниң йәнә ванкувердики хитай консулханисиниң қоллишиға еришкәнлики мәлум. 

“сәзгүр чағ” шеркити сүний әқил техника шеркити болуп, у хитайниң хуавей шеркити билән һәмкарлишип, хитайдики чирай тонуш системисини қуруп чиққан. Мәзкур шеркәт бу йил өктәбирдә америка һөкүмити тәрипидин хитай һөкүмитиниң уйғур елида йүргүзгән тәқибләш сиясәтлиригә һәмкарлишиш билән әйиблинип, “қара тизимлик” кә елинған 28 хитай муәссәсәлириниң бири. 

Бирақ мәзкур шеркәтниң ноябирниң 16-17 кунлири канаданиң ванкувер шәһиридә өткүзүлидиған “хитай мунбири” йиғиниға тәклип қилиниши вә униң дериктори җиммий җовниң бу йиғинда нутуқ бәрмәкчи болуши канададики уйғурларниң қаттиқ наразилиқини қозғиған. 

Канада ванкувер уйғур бирликиниң яшлар рәиси салинна нурәли “CBC хәвәрлири” гә хәт йезип, “канададики уйғур җамаитиниң беританийә коломбийәси университети” мәмурийитиниң бу һәрикитидин қаттиқ әпсусланғанлиқини билдүргән. У йәнә мәктубида “хитайдики уйғурлар йиғивелиш лагерлирини баштин кәчүрүватқан мушу минутларда канада америка билән бир сәптә туруп, хитай һөкүмитиниң уйғурларниң негизлик һоқуқлириға қиливатқан бастурушлириға қарши туруши керәк,” дәп көрсәткән. 

Хәвәрдә ейтилишичә, бу йиғинни уюштуруған тиҗарәт кулубиниң башлиқи мишәл лав өзлириниң канададики уйғурлардин кәлгән наразилиқтин туюқсизлиқ һес қилғанлиқини, өзлириниң дәрһал бу мәсилигә қарап чиқип, керәклик тәдбирләрни алидиғанлиқини билдүргән. Бирақ “сәзгүр чағ” шеркити бу һәқтики соалларға җаваб бәрмигән.