Д у қ канада һөкүмитини уйғур мусапирлирини қобул қилишқа дәвәт қилмақчи

Мухбиримиз әзиз
2021-11-24
Share

Дуня уйғур қурултийи (д у қ) ниң рәиси долқун әйса канада һөкүмитини уйғур мәҗбурий әмгикигә четишлиқ мәһсулатларға канада таможнисида тутуп қелиш һәмдә хитай һөкүмитиниң зулумлири түпәйлидин дуняниң һәрқайси җайлирида сәрсан болуп йүрүватқан уйғур қачқунлириға вә мусапирлириға панаһлиқ беришкә дәвәт қилиш үчүн мушу һәптидә канадада хизмәт зияритидә болмақтикән.

Канададики әң чоң гезитләрниң бири болған "йәршари вә почта" гезитиниң23-ноябирдики хәвиридә ейтилишичә, долқун әйса бу қетимлиқ зиярәт җәрянида канада һөкүмитиниң көчмәнләр ишлири министири шан фрайзер билән, шуниңдәк башқа юқири дәриҗилик әмәлдарлар билән ‍учришидикән. Хәвәрдә ейтилишичә, у йәнә канада парламенти уйғур қирғинчилиқи һәққидә қарар алған туруқлуқ немә үчүн канада һөкүмитиниң бу һәқтә бирәр әмәлий һәрикәттә болмиғанлиқиниң сәвәбини соримақчикән.

Мәлум болушичә, канада һөкүмити һазирға қәдәр бейҗиң олимпик мусабиқисини байқут қилиш, уйғур мәҗбурий әмгикигә четишлиқ мәһсулатларни чәкләш қатарлиқ саһәләрдиму бирәр әмили һәрикәттә болмиған. Шуңа долқун әйса бу һәқтә сөз қилип "парламентниң қарари һечқандақ нәтиҗә яриталмайдиған қуруқ вәдә болуп қалмисикән, дегәнни үмид қилимән" дегән.

Хәвәрдә ейтилишичә, долқун әйсаниң бу қетимқи зияритидә уйғур мусапирлирини канадаға йәрләштүрүш мәсилиси йәнә бир муһим сөһбәт темиси болидикән. Болупму канаданиң һазирғичә "уйғур қачқунлар вә мусапирларни қобул қилиш хизмитини тезләштүрүп беҗириш" саһәсидә һечқандақ һәрикәт қолланмаслиқи буниңдики муһим сәвәбләрниң бири икән. У бу һәқтә тохтилип "һәр йили миңлиған онмиңлиған мусапир вә қачқунға панаһлиқ бериватқан канаданиң нәччә миң уйғурға панаһлиқ бериши һечқанчә қийин иш әмәс" дегән. Болупму түркийәдә яшаватқан 50 миңчә уйғурниң аз дегәндиму 15 миңи иқамәт мәсилиси түпәйлидин һәрқачан тәшвиштә яшимақтикән.

Хәвәрдә ейтилишичә, долқун әйса канада баш министири труду билән көрүшүш тәлипини йоллиған болсиму, баш минстир ишханиси һазирғичә буниңға җаваб бәрмигән. Әмма сабиқ канада баш министири стефен харпер әйни вақитта д у қ ниң сабиқ рәиси рабийә қадир ханимни қобул қилғаникән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт