D u q kanada hökümitini Uyghur musapirlirini qobul qilishqa dewet qilmaqchi

Muxbirimiz eziz
2021-11-24
Share

Dunya Uyghur qurultiyi (d u q) ning re'isi dolqun eysa kanada hökümitini Uyghur mejburiy emgikige chétishliq mehsulatlargha kanada tamozhnisida tutup qélish hemde xitay hökümitining zulumliri tüpeylidin dunyaning herqaysi jaylirida sersan bolup yürüwatqan Uyghur qachqunlirigha we musapirlirigha panahliq bérishke dewet qilish üchün mushu heptide kanadada xizmet ziyaritide bolmaqtiken.

Kanadadiki eng chong gézitlerning biri bolghan "Yershari we pochta" gézitining23-noyabirdiki xewiride éytilishiche, dolqun eysa bu qétimliq ziyaret jeryanida kanada hökümitining köchmenler ishliri ministiri shan frayzér bilen, shuningdek bashqa yuqiri derijilik emeldarlar bilen ‍uchrishidiken. Xewerde éytilishiche, u yene kanada parlaménti Uyghur qirghinchiliqi heqqide qarar alghan turuqluq néme üchün kanada hökümitining bu heqte birer emeliy herikette bolmighanliqining sewebini sorimaqchiken.

Melum bolushiche, kanada hökümiti hazirgha qeder béyjing olimpik musabiqisini bayqut qilish, Uyghur mejburiy emgikige chétishliq mehsulatlarni cheklesh qatarliq sahelerdimu birer emili herikette bolmighan. Shunga dolqun eysa bu heqte söz qilip "Parlaméntning qarari héchqandaq netije yaritalmaydighan quruq wede bolup qalmisiken, dégenni ümid qilimen" dégen.

Xewerde éytilishiche, dolqun eysaning bu qétimqi ziyaritide Uyghur musapirlirini kanadagha yerleshtürüsh mesilisi yene bir muhim söhbet témisi bolidiken. Bolupmu kanadaning hazirghiche "Uyghur qachqunlar we musapirlarni qobul qilish xizmitini tézleshtürüp béjirish" saheside héchqandaq heriket qollanmasliqi buningdiki muhim seweblerning biri iken. U bu heqte toxtilip "Her yili minglighan onminglighan musapir we qachqun'gha panahliq bériwatqan kanadaning nechche ming Uyghurgha panahliq bérishi héchqanche qiyin ish emes" dégen. Bolupmu türkiyede yashawatqan 50 mingche Uyghurning az dégendimu 15 mingi iqamet mesilisi tüpeylidin herqachan teshwishte yashimaqtiken.

Xewerde éytilishiche, dolqun eysa kanada bash ministiri trudu bilen körüshüsh telipini yollighan bolsimu, bash minstir ishxanisi hazirghiche buninggha jawab bermigen. Emma sabiq kanada bash ministiri stéfén xarpér eyni waqitta d u q ning sabiq re'isi rabiye qadir xanimni qobul qilghaniken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet