Канаданиң икки парламент әзаси хитай әмәлдарлириниң хоңкоң вә уйғур районидики қилмишиға қарши қанун лайиһәси сунғанлиқини билдүргән
Мәзкур қанун тәклип лайиһәсини канада парламентиниң консериватиплар партийәсидин болған кеңәш палата әзалири лео хюсакос билән тән хайно өткән сәйшәнбә күни оттуриға қойған.
-
Мухбиримиз әркин
2019-12-06 -
-
-
Канада парламенти кеңәш палатасиниң 2 нәпәр әзаси һөкүмәтниң магнитиский қанунини ишқа селип, хоңкоң билән уйғур районида кишилик һоқуқни дәпсәндә қиливатқан хитай әмәлдарлирини җазалаш тоғрисида қанун тәклип лайиһәси сунғанлиқини билдүргән. Мәзкур қанун тәклип лайиһәсини канада парламентиниң консериватиплар партийәсидин болған кеңәш палата әзалири лео хюсакос билән тән хайно өткән сәйшәнбә күни оттуриға қойған. Канада таратқулириниң илгири сүрүшичә, кеңәш палата әзалириниң мәқсити бу қанун лайиһәси арқилиқ баш министир теридониң рәһбәрликидики канада һөкүмитини кишилик һоқуқ мәсилисидә хитайға қаттиқ позитсийә тутушқа бесим ишлитишкән.
Кеңәш палата әзаси тән хайно канаданиң “и-политика” намлиқ тор гезитигә бәргән баянатида, өзлириниң бу қанун лайиһәсидә оттавани хитай вә хоңкоң әмәлдарлириниң “кишилик һоқуқни дәпсәндә қилиши, түп адаләт принсиплириға вә қанун билән башқурушқа хилаплиқ қилиши, хоңкоңда йүз бериватқан намайишлар вә хитайдики мусулманларға тутқан муамилиси сәвәблик” уларни җазалашқа чақирғанлиқини билдүргән. У йәнә, өзлириниң “бир канадалиқ болуш сүпитидә хитайдики кишилик һоқуқ дәпсәндичиликигә сүкүт қилмайдиғанлиқини тәмтиләп, “биз бирмидики роһиңга мәсилисини оттуриға қойдуқ. Лекин хитайдики уйғурлар мәсилисидә һечнимә қилмидуқ. Бу иккисиниң қандақ пәрқи бар?” дегән. Лео хюсакос билән тән хайнониң қанун лайиһәси америка авам палатаси “уйғур 2019” намлиқ кишилик һоқуқ қанун лайиһәсини мақуллиған күни оттуриға қоюлған.
Канада таратқулириниң хәвәр қилишичә, лео хюсакос билән тән хайнониң қанун лайиһәси дәрһал хитайниң қаршилиқиға учриған. Хитайниң канадада турушлуқ баш әлчиси соң пейву тәһдит селип, “әгәр канада парламенти бу лайиһәни қобул қилса, буниңға қарита қаттиқ тәдбир қоллинидиғанлиқи” ни илгири сүргән. Көзәткүчиләрниң илгири сүрүшичә, әгәр мәзкур қанун лайиһәси мақулланса, бу теридо һөкүмитигә хитайға қарита қаттиқ қол болуш тоғрисида күчлүк сигнал беридикән.