Kanadaning ikki parlamént ezasi xitay emeldarlirining xongkong we Uyghur rayonidiki qilmishigha qarshi qanun layihesi sun'ghanliqini bildürgen

Muxbirimiz erkin
2019-12-06
Élxet
Pikir
Share
Print

Kanada parlaménti kéngesh palatasining 2 neper ezasi hökümetning magnitiskiy qanunini ishqa sélip, xongkong bilen Uyghur rayonida kishilik hoquqni depsende qiliwatqan xitay emeldarlirini jazalash toghrisida qanun teklip layihesi sun'ghanliqini bildürgen. Mezkur qanun teklip layihesini kanada parlaméntining konsériwatiplar partiyesidin bolghan kéngesh palata ezaliri lé'o xyusakos bilen ten xayno ötken seyshenbe küni otturigha qoyghan. Kanada taratqulirining ilgiri sürüshiche, kéngesh palata ezalirining meqsiti bu qanun layihesi arqiliq bash ministir téridoning rehberlikidiki kanada hökümitini kishilik hoquq mesiliside xitaygha qattiq pozitsiye tutushqa bésim ishlitishken.

Kéngesh palata ezasi ten xayno kanadaning "I-politika‏" namliq tor gézitige bergen bayanatida, özlirining bu qanun layiheside ottawani xitay we xongkong emeldarlirining "Kishilik hoquqni depsende qilishi, tüp adalet prinsiplirigha we qanun bilen bashqurushqa xilapliq qilishi, xongkongda yüz bériwatqan namayishlar we xitaydiki musulmanlargha tutqan mu'amilisi seweblik" ularni jazalashqa chaqirghanliqini bildürgen. U yene, özlirining "Bir kanadaliq bolush süpitide xitaydiki kishilik hoquq depsendichilikige süküt qilmaydighanliqini temtilep, "Biz birmidiki rohingga mesilisini otturigha qoyduq. Lékin xitaydiki Uyghurlar mesiliside héchnime qilmiduq. Bu ikkisining qandaq perqi bar?" dégen. Lé'o xyusakos bilen ten xaynoning qanun layihesi amérika awam palatasi "Uyghur 2019‏" namliq kishilik hoquq qanun layihesini maqullighan küni otturigha qoyulghan. 

Kanada taratqulirining xewer qilishiche, lé'o xyusakos bilen ten xaynoning qanun layihesi derhal xitayning qarshiliqigha uchrighan. Xitayning kanadada turushluq bash elchisi song péywu tehdit sélip, "Eger kanada parlaménti bu layiheni qobul qilsa, buninggha qarita qattiq tedbir qollinidighanliqi" ni ilgiri sürgen. Közetküchilerning ilgiri sürüshiche, eger mezkur qanun layihesi maqullansa, bu térido hökümitige xitaygha qarita qattiq qol bolush toghrisida küchlük signal béridiken.

Toluq bet