Хәлқара кәчүрүм тәшкилати хитайни уйғур елидики лагерларни дәрһал тақашқа чақирди

Мухбиримиз ирадә
2019-03-14
Share

14-Март хәлқара кәчүрүм тәшкилати бир баянат елан қилип, хитай һөкүмитини уйғур елидики лагерларда тутуп турулуватқан барлиқ тутқунларни дәрһал азад қилишқа вә бирләшкән дөләтләр тәшкилатиниң районда мустәқил тәкшүрүш елип бериш һәққидики тәлипигә иҗабий җаваб қайтурушқа чақирди.

Йеқинда хитай һөкүмити өткән йили ноябирда бирләшкән дөләтләр тәшкилатида хитайниң кишилик һоқуқ хатирисигә универсал вә қәрәллик қарап чиқиш йиғинида хитайға сунулған 346 тәклип-пикир арисидики 62 тәклипни “хитайниң дөләт әмәлийити вә қанунлириға уйғун әмәс, у сиясий қаратмилиққа игә” дәп рәт қилған иди.

Хәлқара кәчүрүм тәшкилати 14-марттики баянатида хитайниң бу һәрикитини “б д т мутәхәссислириниң тәклиплирини номуссизларчә йоққа чиқарғанлиқ” дәп әйиблигән.

Мәлум болушичә, хитай рәт қилған маддилар асасән хитай һөкүмитиниң уйғур елида вә шундақла тибәт районида йүргүзүватқан миллий вә дини бесим сиясәтлири, өлүм җазаси, хусусий әркинлик мәсилилиригә аит тәклип-пикирләр икән.

Алдинқи күни йәнә хәлқаралиқ кишилик һоқуқ органлири ортақ баянат елан қилип, явропа иттипақи вә униңға әза дөләтләрни кишилик һоқуққа еғир тәһдит пәйда қиливатқан хитайға бесим ишлитишкә чақирди.

Мәлум болушичә, йилда бир қетим өткүзүлидиған “явропа иттипақи-хитай диялоги” алдимиздики айда бирюсселда ечилидикән. Һәрқайси кишилик һоқуқ органлири болса явропа иттипақини бу пурсәттин пайдилинип кишилик һоқуқ мәсилисидә хитайға қарши тәдбир елишқа чақирмақта.

Улар баянатида алди билән хитай һөкүмитиниң уйғур елида бир милйондин ошуқ кишини лагерға қамиғанлиқи һәққидә ишәнчлик мәлуматлар барлиқи вә лагер сиртидиму уйғурлар вә башқа йәрлик мусулман хәлқләр һаятиниң еғир дәриҗидә назарәткә елиниватқанлиқини мисал қилиш арқилиқ явропа иттипақини хитайниң дөләт ичи вә сиртида кишилик һоқуқни дәпсәндә қилишиға қарап турмаслиққа чақирған.

Юқириқи бу баянатқа хәлқара кәчүрүм тәшкилати, хәлқара хиристиян һәмкарлиқи тәшкилати, хәлқара кишилик һоқуқ мулазимити қатарлиқ 10 дин артуқ тәшкилат имза қойған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт