Хәлқара кәчүрүм тәшкилати ислам һәмкарлиқ тәшкилатини рамизанда уйғурларниң диний әркинликини қоғдашқа чақирди

Мухбиримиз әркин
2019-05-03
Елхәт
Пикир
Share
Принт

Хәлқара кәчүрүм тәшкилати рамизан һарписида мусулманларниң ислам һәмкарлиқ тәшкилатиға хәт йезип, мәзкур органни уйғурларниң диний ибадәт әркинликини қоғдашқа чақириш һәрикити қозғиди. Мәзкур тәшкилат шу мунасивәт билән 3‏-май күни елан қилған чақириқида, уйғур аптоном районида яшайдиған уйғур, қазақ вә башқа мусулман хәлқләрниң кәмситишкә, диний ибадәт әркинликиниң еғир чәкләшкә учраватқанлиқи, мәзкур районда «бир милйондәк кишиниң диний етиқади, мәдәнийәт тонушини өзгәртип, дөләткә болған сиясий садақәтмәнликини қолға кәлтүрүш мәқситидә ‹қайта-тәрбийәләш лагерлири' ға қамалғанлиқини билдүргән.

Чақириқта йәнә, хитай даирилириниң рамизанда ресторанларниң дәм елиши, кишиләрниң мәсчитләргә беришини чәклигәнлики, оқуғучилар вә партийә әзалириниң роза тутушини мәни қилғанлиқи тәкитлинип, мусулманларниң мәнпәәти вә кишилик һоқуқини қоғдашқа мәсул ислам һәмкарлиқ тәшкилати вә униң мустәқил кишилик һоқуқ комитетини һәрикәткә өтүшкә чақирилған. Чақириқта: «улар хитай һөкүмитини шинҗаңдики етник милләтләрниң диний әркинлик һоқуқиға һөрмәт қилишқа вә униңға капаләтлик қилишқа, җазалашни тохтитишқа, пәқәт кишилик һоқуқни тинчлиқ билән йүргүзгәнлики үчүн җазалашқа хатимә беришкә чақириши керәк» дейилгән. Чақириқта йәнә, мусулманларниң ислам һәмкарлиқ тәшкилати кишилик һоқуқ комитетиға елхәт әвәтип, уйғур районида җазалашқа учраватқан мусулманларни қоллашни тәләп қилишқа үндигән.

Ислам дөләтлириниң хитайниң уйғур районидики мусулманларни кәң көләмлик тәқибләш, тутқун қилиш, бастуруш вә лагерларға қамаш һәрикәтлиригә сүкүт қилип келиши ғәрб әллирини һәйран қалдурған. Йеқинда ислам һәмкарлиқ тәшкилати бейҗиң һөкүмитиниң мусулманларға қаратқан сияситини қоллайдиғанлиқини билдүрүши, кишилик һоқуқ тәшкилатлириниң қаттиқ тәнқидигә учриған иди.

Пикирләр (0)
Share
Толуқ бәт