Xelq'ara kechürüm teshkilati islam hemkarliq teshkilatini ramizanda Uyghurlarning diniy erkinlikini qoghdashqa chaqirdi

Muxbirimiz erkin
2019-05-03
Share

Xelq'ara kechürüm teshkilati ramizan harpisida musulmanlarning islam hemkarliq teshkilatigha xet yézip, mezkur organni Uyghurlarning diniy ibadet erkinlikini qoghdashqa chaqirish herikiti qozghidi. Mezkur teshkilat shu munasiwet bilen 3‏-may küni élan qilghan chaqiriqida, Uyghur aptonom rayonida yashaydighan Uyghur, qazaq we bashqa musulman xelqlerning kemsitishke, diniy ibadet erkinlikining éghir chekleshke uchrawatqanliqi, mezkur rayonda “Bir milyondek kishining diniy étiqadi, medeniyet tonushini özgertip, döletke bolghan siyasiy sadaqetmenlikini qolgha keltürüsh meqsitide ‛qayta-terbiyelesh lagérliri‚ gha qamalghanliqini bildürgen.

Chaqiriqta yene, xitay da'irilirining ramizanda réstoranlarning dem élishi, kishilerning meschitlerge bérishini chekligenliki, oqughuchilar we partiye ezalirining roza tutushini men'i qilghanliqi tekitlinip, musulmanlarning menpe'eti we kishilik hoquqini qoghdashqa mes'ul islam hemkarliq teshkilati we uning musteqil kishilik hoquq komitétini heriketke ötüshke chaqirilghan. Chaqiriqta: “Ular xitay hökümitini shinjangdiki étnik milletlerning diniy erkinlik hoquqigha hörmet qilishqa we uninggha kapaletlik qilishqa, jazalashni toxtitishqa, peqet kishilik hoquqni tinchliq bilen yürgüzgenliki üchün jazalashqa xatime bérishke chaqirishi kérek” déyilgen. Chaqiriqta yene, musulmanlarning islam hemkarliq teshkilati kishilik hoquq komitétigha élxet ewetip, Uyghur rayonida jazalashqa uchrawatqan musulmanlarni qollashni telep qilishqa ündigen.

Islam döletlirining xitayning Uyghur rayonidiki musulmanlarni keng kölemlik teqiblesh, tutqun qilish, basturush we lagérlargha qamash heriketlirige süküt qilip kélishi gherb ellirini heyran qaldurghan. Yéqinda islam hemkarliq teshkilati béyjing hökümitining musulmanlargha qaratqan siyasitini qollaydighanliqini bildürüshi, kishilik hoquq teshkilatlirining qattiq tenqidige uchrighan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet