Xelq'ara kechürüm teshkilati xitayning gherb uniwérsitétliridiki “Chégra halqighan basturushliri” ni ashkarilidi

Washin'gtondin muxbirimiz erkin teyyarlidi
2024.05.13

Xelq'ara kechürüm teshkilati 13-may küni mexsus doklat élan qilip, xitay hökümitining gherb uniwérsitétlirida oquwatqan xitay chong quruqluqi we xongkongluq oqughuchilargha qarita parakendilik, nazaret we chégra halqighan basturush heriketlirini élip bériwatqanliqini ilgiri sürgen.

Doklatta qeyt qilinishiche, xitay da'iriliri yawropa we shimaliy amérikadiki uniwérsitétlarda oquwatqan siyasiy jehettin aktip oqughuchilargha qarita élip barghan “Chégra halqighan basturush” ta, oqughuchilarning xitaydiki a'ilisini parakende qilish, oqughuchilarni nazaret qilish qatarliq wasitilerni qollanmaqtiken. Doklatta, chet'elde oquwatqan xitay we xongkongluq oqughuchilarning qorqutush, parakendichilik, nazaret qilinish endishiliri ichide yashaydighanliqi, xitay da'irilirining ularning chet'elde “Nazuk” téma yaki siyasiy mesililerge chétilishining aldini alidighanliqi tekitlen'gen.

“Mektipimiz qorusi ichide men qorqup yashaymen” mawzuluq bu doklat, bélgiye, gérmaniye, firansiye, en'gliye, gollandiye, shiwétsariye, kanada, amérika qatarliq döletlerning uniwérsitétlirida oquwatqan 32 neper oqughuchi ziyaret qilinish arqiliq teyyarlan'ghan.

Melum bolushiche, bu oqughuchilarning 12 nepiri xongkongluq iken. Ziyaret qilin'ghan 32 neper oqughuchining ichide Uyghurlarning bar-yoqluqi melum bolmisimu, emma burun shimaliy amérikadiki bezi uniwérsitétlarda Uyghur irqiy qirghinchiliqini tonushturghan Uyghurlarning hujumgha uchrash weqelirimu yüz bergen.

Xelq'ara kechürüm teshkilatining xitay ishliri diréktori sarah bruks: “Bu doklatta toplan'ghan guwahliqlar xitay we xongkong hökümetlirining oqughuchilarni öyidin nechche ming chaqirim yiraqliqta bolsimu jimiqturushqa urun'ghanliqi, nurghun oqughuchilarni qorqunch ichide qaldurghanliqining ‍échinishliq kartinisini sizip berdi” dégen.

Melum bolushiche, doklatta, bu oqughuchilarni oqushqa qobul qilghan sahibxan döletlerning “Chégra halqighan basturush” qa qarshi turushi, uniwérsitétlarning ilmiy erkinlik we kishilik hoquqni qoghdishi telep qilghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.