Xelq'ara kechürüm teshkilati xitayni lagérlar heqqidiki yalghan teshwiqatliridin waz kéchishke chaqirdi

Muxbirimiz irade
2019.11.25

Lagérlargha a'it mexpiy höjjetler ashkarilan'ghandin kéyin, Uyghur élide yolgha qoyuluwatqan bu zor kölemlik tutqun herikitining xitayning yuqiri derijilik dölet rehberliri teripidin inchikilik bilen pilanlan'ghan bir heriket ikenliki aydinglashqanidi. Buning bilen xelq'arada lagérlarni taqash we xitay hökümitini jawabkarliqqa tartish heqqidiki chaqiriqlar künsayin kücheymekte.

Xelq'ara kechürüm teshkilati 25-noyabir düshenbe küni bayanat élan qilip, xitay hökümitini Uyghur élide yürgüzüwatqan qorqunchluq siyasetlirini derhal ayaghlashturushqa chaqirghan.

Kechürüm teshkilatining sherqiy asiya diréktori lisa tassi bayanattiki sözide: “Xitay hökümiti lagérlarning mewjutluqini izchil ret qilip kelgen bolsimu, biraq bu ashkarilan'ghan höjjetler sayiside ularning Uyghur qatarliq az sanliq milletlerge qiliwatqan yirginchlik ziyankeshlikige a'it taghdek pakitlar otturigha chiqti” dégen.

U yene, höjjetlerde ashkarilan'ghan qorqunchluq tepsilatlarning özliri lagér shahitliridin igiligen ehwallar bilen oxshash ikenlikini eskertip: “Her hepte xelq'ara jama'etchilik xitay hökümitining shinjangdiki puqralirigha qiliwatqan qorqunchluq tüzümler toghrisida yéngi melumatlardin xewer tépiwatidu. Emdi xitay hökümiti lagérlar heqqide ‛biz ulargha kespiy maharet terbiyesi bériwatimiz‚, dégen'ge oxshash put tirep turalmaydighan teshwiqatlirini toxtitidighan waqit keldi.” dégen.

Ular yene bayanatida töwendiki chaqiriqlarni qilghan: “Xitay hökümiti derhal özining yéqinliridin xewer élishqa teqezza bolup turuwatqan yüz minglarche kishige jawab bérishi kérek. Ashkarilan'ghan höjjetler xelq'ara jama'etni xitay hökümitige zulumini ayaghlashturush heqqide yenimu küchlük bésim qilishqa heriketlendürüshi lazim”.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.