Yézilardiki chong yashlardiki ayallarmu kembeghelliktin qutulush namidiki emgeklerge sélinmaqta

Muxbirimiz sada
2019.09.12

Uyghurlar diyaridiki siyasiy basturush xelq'ara jama'et arisida zor ghulghula peyda qiliwatqanda xitay hökümiti Uyghur diyarining jenubidiki üch wilayet we bir oblastta atalmish “Namratliqni tügitip, béyish yoligha bashlash” namidiki heriketlirini téximu küchep qanat yaydurmaqtiken.

Shinxu'a torining 11-séntebirdiki süretlik xewirige qarighanda, bu üch wilayet we bir oblasttiki atalmish “Namrat déhqanlar” ning nopusi xitay döliti “Éghir derijidiki namrat rayonlar” dep békitken üch wilayet üch oblasttiki namrat nopusning yérimigha yéqinlashqan. Xewerde bu jaylar atalmish “Namratliqni tügitish” tiki “Mustehkem istihkam urushi” ning eng muhim we qiyin nuqtisi ikenliki tekitlen'gen.

Mezkur süretlik xewerde yéshi texminen 60 lardin halqighan Uyghur anilarning yalangwash halette, ish kiyimi kiygen halda yangaqlarni ilghawatqan körünüshi diqqetni qozghighan. Uyghurlarning hazirghiche dawamliship kelgen en'eniside ottura yashtin halqighan Uyghur ayalliri béshigha yaghliq artidighan bolup, közetküchiler buningdin mezkur chong yashtiki yéza ayallirining “Béyish” namida mejburiy we teshkillik shekilde emgekke séliniwatqanliqini körüwélish mumkinlikini otturigha qoymaqta. Uyghur ayalliri, bolupmu chong yashtiki Uyghur ayallar we momaylar birdek yaghliq artish en'enisige ige idi.

Xewerde yene xoten shehiri kériye nahiyesidiki atalmish “Yéza éshincha emgek küchliri” ning toqumichiliq fabrikilirida “Terbiyelen'genliki” shu arqiliq kéyin, burunqi namrat turmushidin qutulghanliqi alahide éytip ötülgen.

Ötken mezgilde “Zimistan” tori bir xewer élan qilip, xitay hökümiti izchil tekitlewatqan “Kespiy terbiyelesh mektipi” diki Uyghurlarning “Hüner öginip emgek qilishi” ning ich sirini pash qilghan. Uningda éytilishiche, bu jaydiki Uyghurlar lagérlargha yandash sélin'ghan zawutlarda “Özgertish” ning bir qismi süpitide zawut ishchiliri ornida heqsiz yaki töwen kirimde emgek qilmaqta iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.