Америка кеңәш палатаси “уйғур кишилик һоқуқ қанун лайиһәси” ни тезрәк мақуллашқа чақирилди
Америка уйғур бирләшмиси 8-декабир күни йиғин чақирип, америка кеңәш палатасиниң “уйғур кишилик һоқуқ қанун лайиһәси” ни тезрәк мақуллиши үчүн америкадики барлиқ уйғурларни омумйүзлүк сәпәрвәрликкә чақирди.
-
Мухбиримиз әркин
2019-12-09 -
-
-
Америка уйғур бирләшмиси 8-декабир күни йиғин чақирип, америка кеңәш палатасиниң “уйғур кишилик һоқуқ қанун лайиһәси” ни тезрәк мақуллиши үчүн америкадики барлиқ уйғурларни омумйүзлүк сәпәрвәрликкә чақирди.
Йиғинда қанун лайиһәсиниң кеңәш палатасида мушу ай ичидә авазға қоюлушини қолға кәлтүрүш тәкитлинип, шуңа америкадики һәр бир уйғурниң кеңәш палата рәһбири мич микконелға вә башқа кеңәш палата әзалириға телефон қилиши, хәт йезиши, йүз туранә көрүшүши, шуниңдәк америка җәмийитигә хизмәт ишләп, тәтқиқатчилар, аммиви тәшкилатлар, таратқулар вә қолум-қошниларни сәпәрвәрликкә кәлтүрүши тәләп қилинди.
Американиң вирҗинийә штатидики уйғур мәркизидә өткүзүлгән йиғинға америка уйғур бирләшмисиниң муавин рәиси тумарис алмас риясәтчилик қилди. Йиғинда америка уйғур бирләшмиси рәиси қуззат алтай сөз қилип, уйғурларниң вақит билән бәслишиватқанлиқи, шуңа һәр бир уйғур бу ишниң бир учини тутуши керәкликини тәкитләп, әгәр: “бу қанун өтүп қалса, бу уларниң ғәлибиси әмәс, бәлки милйонлиған уйғурниң аһу-зариниң пәләкни титрәткәнликидур” деди.
“уйғур кишилик һоқуқ қанун лайиһәси” 3-декабир күни америка авам палатасида мақулланған. Мәзкур қанун лаһийәсиниң авам палатасида мақуллиниши хитайни қаттиқ биарам қилған. У қанун лайиһәсигә қарши омумйүзлүк тәшвиқат уруши башлиғаниди. Нөвәттә, мәзкур қанун лайиһәси кеңәш палатасиниң мақуллуқидин өтсә андин президентниң алдиға бариду. Униң қачан кеңәш палатасида авазға қоюлуши намәлум. Йәкшәнбә күнки йиғин мушундақ бир һалқилиқ вәзийәттә чақирилғаниди.
Йиғинда америкадики адвокат, уйғур кишилик һоқуқ қурулушиниң рәиси нури түркәл, америка дөләт мәҗлисиниң хизмити, қанун лайиһәсиниң қанунға айлиниш тәртипи қатарлиқлар һәққидә доклат берип, қанун лайиһәсини 12-ай ичидә авазға қоюшниң пәвқуладдә муһимлиқини тәкитлигән. Йиғин ахирида, уйғурларниң 10-декабир күни америка дөләт мәҗлисидә йәнә бир қетим паалийәт елип берип, кеңәш палата әзалириға хизмәт ишлиши қарар қилинди.