Amérika kéngesh palatasi "Uyghur kishilik hoquq qanun layihesi" ni tézrek maqullashqa chaqirildi

Muxbirimiz erkin
2019-12-09
Élxet
Pikir
Share
Print

Amérika Uyghur birleshmisi 8‏-dékabir küni yighin chaqirip, amérika kéngesh palatasining "Uyghur kishilik hoquq qanun layihesi" ni tézrek maqullishi üchün amérikadiki barliq Uyghurlarni omumyüzlük seperwerlikke chaqirdi.

Yighinda qanun layihesining kéngesh palatasida mushu ay ichide awazgha qoyulushini qolgha keltürüsh tekitlinip, shunga amérikadiki her bir Uyghurning kéngesh palata rehbiri mich mikkonélgha we bashqa kéngesh palata ezalirigha téléfon qilishi, xet yézishi, yüz turane körüshüshi, shuningdek amérika jem'iyitige xizmet ishlep, tetqiqatchilar, ammiwi teshkilatlar, taratqular we qolum-qoshnilarni seperwerlikke keltürüshi telep qilindi.

Amérikaning wirjiniye shtatidiki Uyghur merkizide ötküzülgen yighin'gha amérika Uyghur birleshmisining mu'awin re'isi tumaris almas riyasetchilik qildi. Yighinda amérika Uyghur birleshmisi re'isi quzzat altay söz qilip, Uyghurlarning waqit bilen beslishiwatqanliqi, shunga her bir Uyghur bu ishning bir uchini tutushi kéreklikini tekitlep, eger: "Bu qanun ötüp qalsa, bu ularning ghelibisi emes, belki milyonlighan Uyghurning ahu-zarining pelekni titretkenlikidur" dédi.

"Uyghur kishilik hoquq qanun layihesi" 3‏-dékabir küni amérika awam palatasida maqullan'ghan. Mezkur qanun lahiyesining awam palatasida maqullinishi xitayni qattiq bi'aram qilghan. U qanun layihesige qarshi omumyüzlük teshwiqat urushi bashlighanidi. Nöwette, mezkur qanun layihesi kéngesh palatasining maqulluqidin ötse andin prézidéntning aldigha baridu. Uning qachan kéngesh palatasida awazgha qoyulushi namelum. Yekshenbe künki yighin mushundaq bir halqiliq weziyette chaqirilghanidi.

Yighinda amérikadiki adwokat, Uyghur kishilik hoquq qurulushining re'isi nuri türkel, amérika dölet mejlisining xizmiti, qanun layihesining qanun'gha aylinish tertipi qatarliqlar heqqide doklat bérip, qanun layihesini 12‏-ay ichide awazgha qoyushning pewqul'adde muhimliqini tekitligen. Yighin axirida, Uyghurlarning 10-dékabir küni amérika dölet mejliside yene bir qétim pa'aliyet élip bérip, kéngesh palata ezalirigha xizmet ishlishi qarar qilindi.

Toluq bet