Türkiyede tutqun qilin'ghan Uyghur karxanichi kérem mamut shertlik qoyup bérilgen

Muxbirimiz irade
2019-02-05
Élxet
Pikir
Share
Print

"Jenubiy xitay sehiri" géziti 5‏-féwral küni türkiye saqchi da'iriliri teripidin 2018-yili 31-öktebir küni "Térrorluq teshkilatlirigha chétishliq bolush" gumani bilen tutqun qilin'ghan Uyghur karxanichi we réstoran xojayini kérem mamut heqqide mexsus xewer ishlidi.

Xewerde bayan qilinishiche, 31-öktebir küni axsham 20 din oshuq türk saqchisi uni istanbuldiki öyidin tutqun qilghan. Kérem mamut 3 ay istanbul we izmir sheherliridiki chet'elliklerni tutup turush orunlirida héchqandaq sot qararisiz tutup turulghandin kéyin, bu yil 25-yanwar küni tuyuqsizla shertlik halda qoyup bérilgen.

Kérem mamut, yeni jem'iyette kérem atush dep tonulghan bu kishining muxbirgha éytishiche, 3 ay jeryanida soraqchilar uningdin dawamliq xitaygha qayturulushni xalaydighan yaki xalimaydighanliqini sorighan. Deslepte u we uning ayali uning belkim bir uqushmasliqtin tutqun qilin'ghan bolushi mumkinlikini perez qilghan bolsimu, emma tutqun waqti uzarghanséri ularning bu ishta xitayning qoli barliqi heqqidiki gumanliri kücheygen.

Kérem mamutning adwokati lokman akchaymu muxbirgha bu dawaning "Tolimu sirliq" ikenlikini éytip, "Hazirghiche uning térrorluq teshkilatliri bilen alaqisi barliqigha a'it konkrét bir ispat körsitilip baqmidi" dégen.

Istansimiz yéqinda igiligen uchurlirida kérem mamut qurghuchiliridin biri bolghan "Miraj" réstoranining xitay da'iriliri teripidin péchetlinip, uning ishchi-xizmetchiliri shundaqla yene bu réstoranning Uyghur élidiki shériklirining hemmisining tutqun qilin'ghanliqi heqqide xewer tarqatqan idi. Radiyomizgha kelgen bu heqtiki inkaslarda qeyt qilinishiche, da'iriler bu réstoranni taqashta uning qoyuq Uyghur milliy uslubtiki bézek we neqishlirining "Bölgünchilik" we "Ashqunluq" idiyelirini oyghitish hemde terghib qilish roli bar dégenni bahane qilghan.

Kérem mamut we uning ayalining "Jenubiy xitay sehiri" gézitige éytishiche, bu yil birinchi ayda kérem mamutning ayali bir dosti arqiliq yoldishining Uyghur élidiki barliq mal-mülkining da'iriler teripidin musadire qilin'ghanliqidin xewer tapqan. Bundin sirt yene, kérem mamutning oghli semi kéremmu xitay saqchiliri teripidin tutqun qilin'ghan.

Chet'ellerdiki kishilik hoquq közetküchiliri "Bu, xitay hökümitining chet'ellerde yashawatqan Uyghurlarning péyigha chüshüp, ularni mejburiy qayturush herikitining bir qismi bolushi mumkin", dep qarimaqta.

Nöwette shertlik qoyup bérilgen kérem mamut uning dawasi heqqide bir qarar bérilgüche her heptide bir qétim köchmenler idarisige bérip özini melum qilmaqtiken.

Toluq bet