Hindistan hökümiti keshmir mesilisini hel qilishta xitaydin ülge élishni istimekte

Uzundin buyan hindistan hökümitining béshini aghritip kéliwatqan ishlarning biri keshmir mesilisi hésablinidu. Yéqinda hindistanning bu jehette xitay hökümitini ülge qilishqa qiziqip qéliwatqanliqi melum boldi. CNN Ning analizchisi jéymis griffis imzasida 8-awghust élan qilin'ghan bu heqtiki maqalida del mushu mesililer tehlil qilinidu.

Aptorning bayan qilishiche, Uyghur diyari bilen keshmir nurghun jehette oxshiship kétidiken. Birinchidin, her ikkisi musteqilliqni istewatqan rayonlar iken؛ ikkinchidin, her ikki rayondiki asasliq ahale musulmanlar iken؛ üchinchisi, her ikki rayonning kontrolluq hoquqini tutup turuwatqanlar birdek yerlik bilen héchqandaq ortaqliqi yoq “Kapir” hökümet bolup, shu jaylardiki musulmanlar herqachan özlirini “Barghanséri éghir bésimlargha duch kéliwatimiz” dep hés qilmaqta iken. 

Maqalida körsitilishiche, Uyghurlarning öz yurtlirida ikkinchi derijilik puqragha aylandurulushi, xitay aqqunlirining köplep köchüp kélishi bilen Uyghurlarning az sanliqqa aylinishi, buninggha qoshulup yéqinda melum bolghan ikki milyonche Uyghurning lagérlargha qamilishidek qabahetning otturigha chiqishi hindistan hökümitini qiziqturup kelmekte iken. Bolupmu hindistan bash ministiri naréndra modi xitay hökümitining Uyghur diyarini tinjitipla qalmay, belki yene bu jaygha minglighan xitay sayahetchilerni élip kelgenlikini körüp bu xildiki “Muweppeqiyetlik tejribe” ni keshmir rayonigha tedbiqlashni oylashmaqta iken.