Keshmir höriyet yighinining re'isi gélani: "Pakistan we islam hemkarliq teshkilatining Uyghurlar üchün sözlesh mes'uliyiti bar"

Muxbirimiz erkin
2019-06-10
Élxet
Pikir
Share
Print

Hindistan kontrolluqidiki keshmirdiki "Höriyet yighini" namliq siyasiy partiye we ijtima'iy guruhlarning birleshme orgini xitayning Uyghurlargha tutqun mu'amilisini tenqidlep, pakistan bilen islam hemkarliq teshkilatining Uyghurlar üchün sözlesh mes'uliyiti barliqini bildürgen. Bu sözlerni pakistan hökümiti Uyghurlarning teqdirige köz yumuwalghan bir mezgilde hindistan kontrolluqidiki keshmirdiki bir musulman teshkilatining qilishi xelq'ara taratqularning diqqitini qozghidi.

Özlirini dunyadiki musulmanlarning hammisi, dep kéliwatqan pakistan we se'udi erebistan qatarliq döletlerning xitayning 2 milyondek musulmanni yighiwélish lagérlirigha qamap, ularning medeniyiti we diniy étiqadini cheklishige süküt qilishi gherb démokratik döletlirining we xelq'ara kishilik hoquq teshkilatlirining qattiq tenqidige uchrap kelgenidi. "Ottura sherq we shimaliy afriqa maliye tori" namliq tor zhurnilining xewer qilishiche, keshmir "Höriyet yighini" ning re'isi seyt ali shah gélani yéqinda xitayning Uyghur musulmanlirigha qaratqan basturushini "Heqsizliq, gheyriy insaniyliq" dep eyiblep, "Xitay da'irilirining Uyghur musulmanlirigha tutqan rehimsiz mu'amilisi köp sanliqning zulumi we diniy öchmenlikning eng yirginchlik shekli. Bu her bir wijdanliq insanning omurtqisini silkiwetküdek hadise" dégen. Gélani yene pakistan da'irilirini we islam hemkarliq teshkilatini agahlandurup, ularning "Basturushqa uchrawatqan qérindash Uyghur erkek-ayallar üchün sözlesh mes'uliyiti bar" liqini tekitligen. Xewerde qeyt qilinishiche, pakistan bilen islam hemkarliq teshkilati keshmirning "Öz teqdirini özi hel qilish" herikitini qollap kéliwatqan bolsimu, lékin gélanining Uyghurlar heqqidiki sözi uning prinsip we islami ehkamlarda ching turghanliqini körsitidiken. 

Xewerde yene Uyghurlarning tragédiyesi keshmir üchün, bolupmu pakistan bilen islam hemkarliq teshkilati hindistanning b d t ning keshmir heqqidiki qararlirini ijra qilishigha türtke bolidu, dep qaraydighanlar üchün bir sawaq ikenlikini tekitligen.

Toluq bet