Xitay hökümiti “Kespiy terbiyelesh” ni ottura asiyagha éksport qilmaqchi bolghan

Washin'gtondin muxbirimiz jewlan teyyarlidi
2023.09.28

“Xitay xewerliri tori” ning 27-séntebir küni chiqarghan xewirige qarighanda, “Tunji nöwetlik ‛bir belbagh bir yol‚ kespiy ma'arip shinjang muhakime yighini” küytun shehiride ötküzülgen.

Uyghur rayoni bilen ichkiri xitaydiki bir qanche kespiy institutlar birliship ötküzgen bu yighinda, “Shinjangning ewzellikini jari qildurup, kespiy ma'aripni chiqish nuqtisi qilip, shinjangni sirtqa échiwétishni téximu kéngeytish, kespiy ma'arip xelq'ara hemkarliqini téximu kücheytip, ‛bir belbagh bir yol‚ qurulushining yuqiri süpetlik tereqqiyati üchün xizmet qilish” asasliq muhakime témisi qilin'ghan.

Bu yighinda yene, “Shangxey hemkarliq teshkilatigha eza döletler kespiy ma'aripini rawajlandurush birleshmisi” ish bashlash murasimi ötküzgen. Uyghur rayonidiki kespiy téxnika institutliri özbékistan, qazaqistandiki ikki aliy mektep bilen hemkarliq imzalighan.

Bu xewerde, xitayning qandaqtur “Kespiy terbiyelesh ma'aripi” ni ottura asiyagha tonushturup, u rayondiki zawutliri üchün erzan emgek küchi bayliqidin paydilanmaqchi bolghanliqi bilinmekte.

Nöwette, xitayning “Bir belbagh bir yol” qurulushidiki muhim iqtisadiy baza bolghan Uyghur rayonida tereqqiy qildurush pilanlan'ghan “8 Chong kesip gewdisi” kölemleshken zawutlarni asas qilghan bolup, uninggha nurghun erzan emgek küchining ishlitiliwatqanliqi, jümlidin lagérlargha solan'ghan Uyghurlarningmu barliqi melum bolghanidi. Xitay hökümiti bu lagérlarni xéli burunla “Kespiy terbiyelesh merkizi” dep atighan bolup, atalmish “Éshincha emgek küchliri” nimu melum mezgil terbiyelep, ichkirige yötkep ishlitishke bashlighanidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.