Бортала шәһәрлик “кәспий техника мәктипи” бу йил қишта 3700 нәпәр әмгәк күчигә қарита кәспий маһарәт тәрбийәси елип баридикән

Вашингтондин мухбиримиз әркин тәйярлиди
2023.11.17

Хитайниң уйғур районида әмгәк күчлирини мәҗбурий әмгәкни техиму көләмләштүргәнлики илгири сүрүлүватқан бир вақитта, бортала “кәспий техника мәктипи” бу йил қишта 3700 нәпәр йеза-кәнт әмгәк күчлиригә қарита кәспий маһарәт тәрбийәси елип баридиғанлиқини елан қилған. “шинҗаң гезити” ниң 16-ноябир хәвиридә ашкарилинишичә, бортала шәһәрлик “кәспий техника мәктипи” ниң муавин мудири лу вейхоң “кәспий техника мәктипи” хадимлириниң кәнт, йеза-базар вә кочиларни ‍арилап “кәспий тәрбийәлинишкә еһтияҗлиқ кишиләр” ни ениқлап чиққан. Лекин лу вейхоң қандақ кишиләрниң “кәспий тәрбийәлинишкә еһтияҗлиқ кишиләр” һесаблинидиғанлиқиға чүшәнчә бәрмигән.

Бортала шәһәрлик “кәспий техника мәктипи” ниң 3700 нәпәр “кәспий тәрбийәлинишкә еһтияҗлиқ кишиләр” гә қарита кәспий маһарәт тәрбийиси елип бериш пилани, хитайниң дөләт һамийлиқидики уйғур мәҗбурий әмгәк программисиниң ма шиңрүй дәвридә техиму көләмләшкәнлики вә системилашқанлиқи қәйт қилиниватқан бир вақитта оттуриға қоюлған. Вашингтондики “коммунизм қурбанлири хатирә фонди” ниң алий тәтқиқатчиси адриян зенз өткән һәптә бу һәқтә мақалә елан қилип, уйғур аптоном районлуқ партком секретари ма шиңрүй дәвридә уйғур мәҗбурий әмгикиниң техиму кеңәйгәнлики, униң уйғур әмгәк күчлирини “из қоғлап тәқибләш системиси” қуруп, уйғурларниң иш орунлириға мәһкум қилинғанлиқини, уларниң иш орнидин айрилиши техиму қийинлашқанлиқини илгири сүргән.

“шинҗаң гезити” ниң хәвиридә ейтилишичә, бортала шәһәрлик “кәспий техника мәктипи” ниң муавин мудири лу вейхоң мундақ дегән: “наһайити ениқки, тәрбийәләшни ишқа ашуруш үчүн, бизниң мәктипимиз йеза-базар вә кочиларға чиқип тәрбийәләшкә еһтияҗлиқ кишиләрни ениқлап чиқти, һәмдә бортала шәһириниң район тәрәққият алаһидилики билән бирләштүрүп, илмий вә қоллинишлиқ тәрбийәләш лайиһәси вә нәзәрийә билән әмәлий мәшғулат бирләшкән тәрбийәләш усулини түзүп чиқтуқ”.

Униң ашкарилишичә, бортала шәһәрлик “кәспий техника мәктипи, бу йилдин бери 34 хил кәспий маһарәт түри ечип, 7000 дин артуқ кәспий маһарәт хадими тәрбийәлигән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.