Bortala sheherlik “Kespiy téxnika mektipi” bu yil qishta 3700 neper emgek küchige qarita kespiy maharet terbiyesi élip baridiken

Washin'gtondin muxbirimiz erkin teyyarlidi
2023.11.17

Xitayning Uyghur rayonida emgek küchlirini mejburiy emgekni téximu kölemleshtürgenliki ilgiri sürülüwatqan bir waqitta, bortala “Kespiy téxnika mektipi” bu yil qishta 3700 neper yéza-kent emgek küchlirige qarita kespiy maharet terbiyesi élip baridighanliqini élan qilghan. “Shinjang géziti” ning 16-noyabir xewiride ashkarilinishiche, bortala sheherlik “Kespiy téxnika mektipi” ning mu'awin mudiri lu wéyxong “Kespiy téxnika mektipi” xadimlirining kent, yéza-bazar we kochilarni ‍arilap “Kespiy terbiyelinishke éhtiyajliq kishiler” ni éniqlap chiqqan. Lékin lu wéyxong qandaq kishilerning “Kespiy terbiyelinishke éhtiyajliq kishiler” hésablinidighanliqigha chüshenche bermigen.

Bortala sheherlik “Kespiy téxnika mektipi” ning 3700 neper “Kespiy terbiyelinishke éhtiyajliq kishiler” ge qarita kespiy maharet terbiyisi élip bérish pilani, xitayning dölet hamiyliqidiki Uyghur mejburiy emgek programmisining ma shingrüy dewride téximu kölemleshkenliki we sistémilashqanliqi qeyt qiliniwatqan bir waqitta otturigha qoyulghan. Washin'gtondiki “Kommunizm qurbanliri xatire fondi” ning aliy tetqiqatchisi adriyan zénz ötken hepte bu heqte maqale élan qilip, Uyghur aptonom rayonluq partkom sékrétari ma shingrüy dewride Uyghur mejburiy emgikining téximu kéngeygenliki, uning Uyghur emgek küchlirini “Iz qoghlap teqiblesh sistémisi” qurup, Uyghurlarning ish orunlirigha mehkum qilin'ghanliqini, ularning ish ornidin ayrilishi téximu qiyinlashqanliqini ilgiri sürgen.

“Shinjang géziti” ning xewiride éytilishiche, bortala sheherlik “Kespiy téxnika mektipi” ning mu'awin mudiri lu wéyxong mundaq dégen: “Nahayiti éniqki, terbiyeleshni ishqa ashurush üchün, bizning mektipimiz yéza-bazar we kochilargha chiqip terbiyeleshke éhtiyajliq kishilerni éniqlap chiqti, hemde bortala shehirining rayon tereqqiyat alahidiliki bilen birleshtürüp, ilmiy we qollinishliq terbiyelesh layihesi we nezeriye bilen emeliy meshghulat birleshken terbiyelesh usulini tüzüp chiqtuq”.

Uning ashkarilishiche, bortala sheherlik “Kespiy téxnika mektipi, bu yildin béri 34 xil kespiy maharet türi échip, 7000 din artuq kespiy maharet xadimi terbiyeligen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.