Xitaydiki ataqliq kishilik hoquq adwokati amérikaning bu yilliq “Xel'ara jesur ayallar” mukapatigha érishken

Xitaydiki ataqliq kishilik hoquq adwokati wang yü amérika tashqiy ishlar ministirliqining bu yilliq “Xelqara jesur ayallar” mukapatigha érishken. Amérika tashqiy ishlar ministirliqining 4-mart élan qilghan bu heqtiki bayanatida körsilitishiche, wang yü 2011-yildin béri xitayda “Nurghun nazuk siyasi délolarni qobul qilip, pa'aliyetchiler, ziyalilar, falugungchilar, déhqanlar we ayallar-balilar hoquqi, diniy hoquq, ipade erkinliki, yighilish we teshkillinish erkinlikini öz ichige alghan nurghun erz-shikayet délolirining adwokatliqini qilghan” iken.

Wang yü ilgiri xitay türmisidiki ataqliq Uyghur ziyaliysi ilham toxitini aqlashqimu qatnashqan. Ilham toxti 2014-yili ürümchide “Bölgünchilik” bilen eyiblinip sotlan'ghan. Wang yü ishleydighan béyjingdiki “Féngrüy qanun mulazimet orni” eyni chaghda uning aqlighuchi adwokatliq xizmitini üstige alghan. Biraq xitay hökümiti ilham toxtini ömürlük qamaq jazasigha hökum qilghan idi.

Amérika tashqiy ishlar ministirliqining bildürüshiche, mukapat tarqitish murasimi 8-mart tashqiy ishlar ministiri antoni blinkénning sahibxanliqida ötküzülidiken. Xitaydin bashqa bélurusiye, bérma, kaméron, kolumbiye, kon'go, guwatémala, iran qatarliq döletlerdin kelgen 10 nechche ayalmu bu mukapatqa layiq körülgen. Bu mukapat ötken yili qazaq lagér shahiti sayragul sawutbaygha bérilgen. U chet elge qéchip chiqip xitay lagéridiki kishilik hoquq depsendichilikini baturluq bilen pash qilghanliqi üchün uninggha layiq körülgen idi.