Кишилик һоқуқ көзитиш тәшкилати: «хитай б д т да башқа дөләтләргә уйғур мәсилисини тилға алмаслиқ һәққидә тәһдит салған»

Мухбиримиз әркин
2019-04-01
Елхәт
Пикир
Share
Принт

Кишилик һоқуқ көзитиш тәшкилати 1‏-апрел күни баянат елан қилип, хитайниң б д т кишилик һоқуқ кеңишиниң 40‏-нөвәтлик йиғини җәрянида башқа дөләтләргә уйғур мәсилисини тилға алмаслиқ һәққидә тәһдит салғанлиқини илгири сүрди.

Баянатта қәйт қилинишичә, хитай тәрәп йиғинда униң кишилик һоқуққа хилаплиқ қиливатқанлиқи, уйғур районида бир милйондәк түркий мусулманларни тутқун қилғанлиқиға даир соалларға ишәнчлик җаваб бәрмәйла қалмай, башқа дөләтләргә мәзкур мәсилини тилға алмаслиқ, ғәрб дөләтлириниң чақирған бу һәқтики йиғинлириға қатнашмаслиқ һәққидә тәһдит салған.

Баянатта, кишилик һоқуқ көзитиш тәшкилатиниң җәнвәдики ишханисиниң директори җон фишер, хитайниң йиллардин бери б д т кишилик һоқуқ механизмини аҗизлаштурушқа урунуп келиватқанлиқини тәнқидләп, «шинҗаңдики мусулманларға тутқан муамилигә қарши қозғалған дуняви чақириқ хитайни қорқутти. Шуңа, у ашкара вә йошурун бесим ишлитип, бирләшмә хәлқара һәрикәт қоллинишни тосушқа урунуп кәлмәктә» дегән. Кишилик һоқуқ кеңишиниң йиғини ечиливатқан мәзгилдә америка, канада, германийә, голландийә қатарлиқ дөләтләр җәнвәдә «шинҗаңдики кишилик һоқуқ дәпсәндичилики» һәққидә йиғин өткүзгән иди.

Баянатта қәйт қилинишичә, хитай тәрәп бәзи дөләтләрни 13‏-март өткүзүлгән бу йиғинға қатнашмаслиқ һәққидә агаһландурған. Баянатта, хитай вәкиллириниң б д т әмәлдарлириға бесим ишләткәнлики, йиғинда диний әркинлик вә лагерлар мәсилисидәк һалқилиқ соалларға хата җаваб бәргәнлики, бәзи дөләтләрни хитай кишилик һоқуқ хатирисини махташқа қистиғанлиқи, униң кишилик һоқуқ хатирисини тәнқид қилған дөләтләрни агаһландурғанлиқи, ислам һәмкарлиқ тәшкилатиға әза дөләтләрни хитайниң мусулманларға тутқан муамилисини махташқа риғбәтләндүргәнлики билдүрүлгән.

Баянатта, һөкүмәтләрниң бу йил 6‏-айда өткүзүлидиған б д т кишилик һоқуқ йиғинида хитайға қарши тәдбир қоллиниши керәклики тәкитләнгән. 31‏-Март күни хәлқара кәчүрүм тәшкилати анализ елан қилип, ғайиб болған уйғур, қазақларниң мәсилисини оттуриға қойған. Анализда тәкитлинишичә, аилә тавабиати ғайиб болған чәтәлдики аилиләр уларниң дерикини алмай еғир күнләрни бешидин өткүзмәктикән.

Пикирләр (0)
Share
Толуқ бәт