Kishilik hoquqni közitish teshkilati b d t ning “Shinjangda yiraqtin tekshürüsh élip bérishi” ni telep qildi

Kishilik hoquqbi közitish teshkilati b d t bash katipi antoni gutérrésning shinjangda yiraqtin tekshürüsh élip bérishni qollishini, uning xitay hökümitige shinjanggha kirishke yol qoyulsun yaki qoyulmisun, choqum tekshürüsh élip baridighanliqini éniq éytishini telep qilghan. Mezkur teshkilatning körsitishiche, “Gutérrés béyjingning sörelmilik qilip waqitni kéchiktürishige qarita bir qedem ilgirlep, bachilétning yiraqtin tekshürüsh élip bérishini qollishi we érishken netijisini ashkara élan qilishi kérek” iken.

Bu telepni kishilik hoquqni közitish teshkilatining b d t ishliri dériktori lu'is sharboné ötken heptining axiri bu teshklilatning torida élan qilghan maqaliside otturigha qoyghan. Lu'is sharboné “B d t bash katipi shinjangda yiraqtin tekshürüsh élip bérishni qollishi kérek” mawzuluq maqaliside “Xitay hemkarlashmighan teqdirdimu, xuddi shimali koriye we bérmadiki basturushlarni tekshürgendikidek, shinjang toghrisidiki tekshürüshningmu etrapliq we ishenchilik bolidighanliqi” ni bildürgen.

Lu'is sharbonéning éytishiche, “Xitayning basturush siyasitining ijtima'iy tesirige a'it xitay hökümet höjjetlirini, kishilik hoquq teshkilatliri jümlidin kishilik hoquqni közitish teshkilati we taratqularning sün'iy hemrah süretlirini öz ichige alghan nurghun deliller bar” iken. U antoni gutérrésning kanada CBC qanilining ziyaritini qobul qilip, b d t mutexessislirining Uyghur élida cheklimisiz tekshürüsh élip bérishni ümid qilidighanliqini bildürgen bolsimu, biraq uning “Xitayni shinjangdiki xorlashni toxtitishqa chaqirip baqmighanliqi” tekitlen'gen.