Кишилик һоқуқни көзитиш тәшкилати б д т ниң “шинҗаңда йирақтин тәкшүрүш елип бериши” ни тәләп қилди
Кишилик һоқуқби көзитиш тәшкилати б д т баш катипи антони гутерресниң шинҗаңда йирақтин тәкшүрүш елип беришни қоллишини, униң хитай һөкүмитигә шинҗаңға киришкә йол қоюлсун яки қоюлмисун, чоқум тәкшүрүш елип баридиғанлиқини ениқ ейтишини тәләп қилған.
-
Мухбиримиз әркин
2021-04-12 -
-
-
Кишилик һоқуқби көзитиш тәшкилати б д т баш катипи антони гутерресниң шинҗаңда йирақтин тәкшүрүш елип беришни қоллишини, униң хитай һөкүмитигә шинҗаңға киришкә йол қоюлсун яки қоюлмисун, чоқум тәкшүрүш елип баридиғанлиқини ениқ ейтишини тәләп қилған. Мәзкур тәшкилатниң көрситишичә, “гутеррес бейҗиңниң сөрәлмилик қилип вақитни кечиктүришигә қарита бир қәдәм илгирләп, бачилетниң йирақтин тәкшүрүш елип беришини қоллиши вә еришкән нәтиҗисини ашкара елан қилиши керәк” икән.
Бу тәләпни кишилик һоқуқни көзитиш тәшкилатиниң б д т ишлири дериктори луис шарбоне өткән һәптиниң ахири бу тәшклилатниң торида елан қилған мақалисидә оттуриға қойған. Луис шарбоне “б д т баш катипи шинҗаңда йирақтин тәкшүрүш елип беришни қоллиши керәк” мавзулуқ мақалисидә “хитай һәмкарлашмиған тәқдирдиму, худди шимали корийә вә бермадики бастурушларни тәкшүргәндикидәк, шинҗаң тоғрисидики тәкшүрүшниңму әтраплиқ вә ишәнчилик болидиғанлиқи” ни билдүргән.
Луис шарбонениң ейтишичә, “хитайниң бастуруш сияситиниң иҗтимаий тәсиригә аит хитай һөкүмәт һөҗҗәтлирини, кишилик һоқуқ тәшкилатлири җүмлидин кишилик һоқуқни көзитиш тәшкилати вә таратқуларниң сүний һәмраһ сүрәтлирини өз ичигә алған нурғун дәлилләр бар” икән. У антони гутерресниң канада CBC қанилиниң зияритини қобул қилип, б д т мутәхәссислириниң уйғур елида чәклимисиз тәкшүрүш елип беришни үмид қилидиғанлиқини билдүргән болсиму, бирақ униң “хитайни шинҗаңдики хорлашни тохтитишқа чақирип бақмиғанлиқи” тәкитләнгән.