Kishilik hoquqni közitish teshkilati: “Xitay hökümiti Uyghurlargha qarita insaniyetke qarshi jinayet sadir qiliwatidu”

• Muxbirimiz erkin
  2021-04-19

Kishilik hoquqni közitish teshkilati 19-april doklat élan qilip, xitayning Uyghur we bashqa türkiy musulmanlirigha qarita “Insaniyetke qarshi jinayet” sadir qiliwatqanliqi élan qildi. “Ularning neslini qurutup, kökini qirish: xitayning Uyghur we basha türkiy musulmanlarni nishan qilghan insaniyetke qarshi jinayiti” namliq 53 betlik bu doklatta, xitayning Uyghur we bashqa türkiy musulman xelqlerge qarita keng kölemlik tutqun, qiyin-qistaq we medeniyet basturushi élip barghanliqi tekitlen'gen.

Közetküchilerning éytishiche, xelq'aradiki nupuzluq bu teshkilatning xitayning Uyghurlargha tutqan mu'amilisini “Insaniyetke qarshi jinayet” dep békitishining simwulluq ehmiyiti zor bolup, bu bashqa döletlerning buni ülge élishigha türtke bolidiken. Xelq'ara kishilik hoquqni közitish teshkilatining bu doklati en'giliye parlaménti Uyghur “Irqiy qirghinchiliqi” qarar layihesini 22-april awazgha qoyushning harpisida élan qilindi.

Doklatta éytilishiche, Uyghur élidiki keng kölemlik we sistémiliq tutqun qilish, qiyin-qistaq, medeniyet basturush siyasetlirige we bashqa jinayetlerge xitay rehberliki jawabkar” iken. Doklatta: “Jawabkarlarni jazalash, jawabkarliqqa tartishni algha sürüsh, xitay hökümitige yölinishini özgertish toghrisida bésim ishlitishning birlikke kelgen xelq'ara heriketke éhtiyajliq” ikenlikini bildürgen. Melum bolushiche, kishilik hoquqni közitish teshkilati bu doklatni amérikadiki stanfurd uniwérsitéti qanun fakultéti'ining “Kishilik hoquq we ixtilaplarni hel qilish kiliniki” bilen birliship teyyarlighan iken.