Кишилик һоқуқни көзитиш тәшкилати: "хитай һөкүмити уйғурларға қарита инсанийәткә қарши җинайәт садир қиливатиду"

Мухбиримиз әркин
2021-04-19
Share

Кишилик һоқуқни көзитиш тәшкилати 19-април доклат елан қилип, хитайниң уйғур вә башқа түркий мусулманлириға қарита "инсанийәткә қарши җинайәт" садир қиливатқанлиқи елан қилди. "уларниң нәслини қурутуп, көкини қириш: хитайниң уйғур вә баша түркий мусулманларни нишан қилған инсанийәткә қарши җинайити" намлиқ 53 бәтлик бу доклатта, хитайниң уйғур вә башқа түркий мусулман хәлқләргә қарита кәң көләмлик тутқун, қийин-қистақ вә мәдәнийәт бастуруши елип барғанлиқи тәкитләнгән.

Көзәткүчиләрниң ейтишичә, хәлқарадики нупузлуқ бу тәшкилатниң хитайниң уйғурларға тутқан муамилисини "инсанийәткә қарши җинайәт" дәп бекитишиниң симвуллуқ әһмийити зор болуп, бу башқа дөләтләрниң буни үлгә елишиға түрткә болидикән. Хәлқара кишилик һоқуқни көзитиш тәшкилатиниң бу доклати әнгилийә парламенти уйғур "ирқий қирғинчилиқи" қарар лайиһәсини 22-април авазға қоюшниң һарписида елан қилинди.

Доклатта ейтилишичә, уйғур елидики кәң көләмлик вә системилиқ тутқун қилиш, қийин-қистақ, мәдәнийәт бастуруш сиясәтлиригә вә башқа җинайәтләргә хитай рәһбәрлики җавабкар" икән. Доклатта: "җавабкарларни җазалаш, җавабкарлиққа тартишни алға сүрүш, хитай һөкүмитигә йөлинишини өзгәртиш тоғрисида бесим ишлитишниң бирликкә кәлгән хәлқара һәрикәткә еһтияҗлиқ" икәнликини билдүргән. Мәлум болушичә, кишилик һоқуқни көзитиш тәшкилати бу доклатни америкадики станфурд университети қанун факултетииниң "кишилик һоқуқ вә ихтилапларни һәл қилиш килиники" билән бирлишип тәйярлиған икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт