Amérika awam palata ezasi suzan wayld "Uyghur kishilik hoquq qanun layihesi" ni tézrek maqullashqa chaqirdi

Muxbirimiz erkin
2019-05-10
Élxet
Pikir
Share
Print

Amérika awma palata ezasi suzan wayld 9‏-may küni awam palatasining omumiy yighinida sözge chiqip, amérika kéngesh we awam palatalirini "Uyghur kishilik hoquq qanun layihesi" ni tézrek maqullashqa chaqirghan.

U milyonlighan Uyghur we bashqa musulmanlarning diniy étiqadi we milliti seweblik lagérlargha qamalghanliqi we keng kölemlik zerbe bérish nishanigha aylan'ghanliqi shundaqla ularning tutqun qilinip ten jazasigha uchrawatqanliqini tekitlep, nöwette Uyghurlar "Insaniyet tarixining eng zulmetlik dewride yawatqanliqi" ni bildürgen.

Suzan wayld sözide buninggha qarita dölet mejliside ortaq heriket élip bériliwatqanliqi, buningdin özining ilhamliniwatqanliqini bildürüp, "Shunga men rehberlerning ortaq Uyghur qanun layihisi we Uyghur kishilik hoquq siyasiti qanun layihisini komitétlardin ötküzüp, omumi mejlisning awaz bérishige qoyushni, buning bilen uning awam palatasida maqullinip, kéngesh palatasida maqullishigha türtke bolushini we imza qoyulup qanun'gha aylandurushni chaqirimen" dégen. \

"Uyghur kishilik hoquq qanun layihisi" bu yilning bashlirida amérika dölet mejlisining awam we kéngesh palatalirida birla waqitta otturigha qoyulghan. Mezkur qanun layihisi awam palatasida kristofir simit, tom suzi qatarliq awam palata ezaliri teripidin, kéngesh palatasida marku rubiyo, bab menendez qatarliq kéngesh palata ezaliri teripidin otturigha qoyulghan idi.

Suzan wayld sözining axirida mundaq dégen: "Mushundaq waqitlarda qilin'ghan heriket arqiliqla biz 'hergiz qayta yüz bermeydu' dégen wedimizde turalaymiz. Hemmimiz barawer turup, köz aldimizda yüz bériwatqan bir étnik tazilashqa yaq dep jawab béreyli."

Melum bolushiche, nöwette mezkur qanun layihesige 58 awam palata ezasi, 30 neper kéngesh palata ezasi kapaletlik bergen.

Toluq bet