Кишилик һоқуқ паалийәтчилири мустәбит путин билән ши җинпиңниң токйо олимпек мусабиқиси мурасимиға қатнишишиға қарши турған

Мухбиримиз җәвлан
2021-06-02
Share

Бу йил 7-айда токйода өткүзүлидиған хәлқара олимпек мусабиқисиниң күнсери йеқинлап келишигә әгишип, буниңға четилидиған сәһийә-сағламлиқ вә кишилик һоқуқ мәсилилири йәнә оттуриға қоюлған.

Йеқинда кишилик һоқуқ паалийәтчилири русийә президенти путин билән хитай рәиси ши җинпиңни токйо олимпек мусабиқисиниң ечилиш мурасимиға қатнишишини чәкләш үчүн һәрикәткә өткән болуп, хәлқара олимпек комитетиға "бу икки рәһимсиз диктаторниң хәлқара олимпек мусабиқиси мурасимиға қатнишиши дуня үчүн номус" дегән пикирни илгири сүридиған бир тәләп сунған.

Ләнтос кишилик һоқуқ вә адаләт фонди рәиси катрина ләнтос сивет "вашингтон көзәткүчилири гезити" ниң зияритини қобул қилғанда мундақ дегән: "олимпек мусабиқиси алаһидә тәнтәрбийә мусабиқиси, милйонлиған инсанлар гәрчә тәнтәрбийә һәвәскарлири болмисиму, олипмек йиғининиң һәйвәтлик мәйдани уларни җәлип қилиду. Рәһимсиз диктаторларниң һәммиси бу йиғинниң ечилиш мурасимини өзлири үчүн ғайәт зор тәшвиқат пурсити дәп билиду".

Уйғурларға ирқий қирғинчилиқ йүргүзүватқан вә шу сәвәбтин 2022-йил бейҗиң қишлиқ олимпек мусабиқисини өткүзүш мәсилисидә хәлқара бесимға учраватқан хитай, өзини ақлаш үчүн бейҗиңда йиғин ачқан. Кишилик һоқуқ паалийәтчилирини қаришичә, күнсери йеқинлап келиватқан токйо олимпек мусабиқиси мәлум җәһәттин ейтқанда бир мәйдан кишилик һоқуқ күриши мусабиқисиға айлинип қалған.

Хәлқара олимпек комитетидикиләр "тәнтәрбийәни сиясиға арилаштурмаслиқ" шоарини товлаватқан болуп, катрина ләнтос сиветниң қаришичә, бу комитетиниң сиясийни олимпек мусабиқисидин чәтләштүрүши мәлум җәһәттин ейтқанда, әң начар сиясий тәшвиқат үчүн йол ечип бәргәнлик икән.

Мәлуматларға қариғанда, ләнтос фонди вә башқа кишилик һоқуқ фонди паалийәтчилири хәлқара олимпек мусабиқиси комитетидин ши җинпиң, путин вә башқа 13 нәпәр мустәбитни хәлқара олимпек мусабиқисиниң ечилиш мурасимиға қатнаштурмаслиқни тәләп қилған. Уларниң орни бош қалдурулса, кишиләр у мустәбитләрниң кишилик һоқуқ дәпсәндичилики җинайитигә техиму яхши диққәт қилидикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт