Awstraliye “Magnitiski kishilik hoquq qanuni” maqullaydighanliqini élan qilghan

Muxbirimiz erkin
2021.08.06
Share on WhatsApp
Share on WhatsApp

Awstraliye tashqi ishlar ministiri merisa péyin awstraliyening amérikagha oxshash “Magnitiskiy kishilik hoquq qanuni” maqullap, kishilik hoquqni depsende qilghuchilarni jawabkarliqqa tartidighanliqini élan qilghan. Roytérs agéntliqining xewer qilishiche, merisa peyin 5-awghust élan qilghan bu heqtiki bayanatida, bu qanun “Xelq'ara endishe qozghighan qorqunchluq heriketlerni sadir qilghuchilar” gha qarita nishanliq pul-mu'amile i‍mbargosi we sayahet cheklimisi qoyush imkaniyitige ige qilidighanliqini bildürgen.

Közetküchilerning éytishiche, merisa péyin xitayni tilgha almighan bolsimu, biraq bu qanunning xitaygha qaritilish éhtimalliqi zor iken. Bu yil 3-ayda amérika, yawropa ittipaqi, en'gliye, kanada qatarliq döletler xitayning Uyghurlarni xorlishida aktip rol oynighan bezi xitay emeldarlirini jazalighan. Roytérs agéntliqining bildürüshiche, awstraliye özining qanunini islah qilip, imbargo kölimini kéngeytidiken shundaqla bu yilning axirlirigha qeder konkrét qandaq jaza tedbirlirini yürgüzüshni békitidiken.

Merisa peyin 5-awghust élan qilghan bayanatida yene bu qanun arqiliq “Awstraliye qandaq jayda yüz berse bersun konkrét bir dölet hakimiyitini nishan qilmighan asasta jazalashqa tégishlik heriketlerde bolghan shexs we apparatlargha qarita nishanliq pul-mu'amile jazasi we sayahet émbargosi yürgüzüshke qadir bolidu” dégen. Awstraliyediki Uyghur teshkilatliri awstraliye hökümitini qanun chiqirip, xitayning Uyghur élidiki “Irqiy qirghinchiliqi” ni étirap qilishqa we “Irqiy qirghinchiliq” ta rol oynighan xitay emeldarlirini jawabkarliqqa tartishqa chaqirip kelgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.