Xongkong saqchiliri kitab sodigirini xitaygha qayturup bermeydighanliqini bildürdi

Muxbirimiz jüme
2016-07-06
Share

Xitay da'iriliri ötken ay qoyup bérilgen xongkongluq kitab sodigiri lin rungjigha tehdit salghandin kéyin, xongkong saqchiliri uni xitaygha qayturup bermeydighanliqini we uning bixeterlikige özliri mes'ul bolidighanliqini bildürdi.

61 Yashliq lin rungji (lam wingki) yuqiri derijilik xitay emeldarlirining shexsiy hayati heqqide kitab neshr qilip dang chiqarghan xongkongdiki tongluwen kitabxanisining xadimi. U, ötken yili mezkur kitabxanining besh xizmetchisi bilen tuyuqsiz yoqap ketken we kéyin xitayda téléwizorgha chiqirilip towa qildurulghan idi.

U ötken ayda qoyup bérilgendin kéyin axbaratqa bayanat bérip, özining xitaygha kirgende béshigha qara xalta kiydürülüp tutup kétilgenlikini we öz xéridarlarning uchurlirini xitay saqchi da'irisige tapshurush sherti bilen qoyuwétilgenlikini ashkarilighan.

U, xongkonggha yénip kelgendin kéyin xitaygha qaytishni ret qilghan we xitayda jümlidin ningbo saqchixanisida béshigha kelgen külpetlerni anglatqan idi.

Shinxu'a agéntliqining seyshenbe küni xewer qilishiche, bu heqte pikir bildürgen xitayning ningbo saqchixanisi lin'gha agahlandurush bérip, choqum xitaygha qaytishi kéreklikini, "Eger undaq bolmaydiken bashqiche chare qollinishqa mejbur" ikenlikini bildürgen idi.

Axbaratqa bu heqte bayanat bergen xongkong xewpsizlik idarisining bashliqi li dunggo ( lay tungko) kitab sodigirini xitaygha qayturup bermeydighanliqini körsetti.

U mundaq dédi: " Bizde bir ademni xitay hökümitige ötküzüp béridighan qanuniy yol yoq. Xongkong hökümiti barliq délolarni xongkong qanunigha asasen bir terep qilidu."

Lin rungjining axbaratqa éytishiche, yoqap ketken besh neper kitab sodigirining bir nepiri xitay alahide xadimliri teripidin xongkongdin tutup kétilgen bolup, u shu sewebtin öz bixeterlikidin ensireydiken.

Roytérsning xewer qilishiche, xongkong saqchi da'iriliri zörür tépilsa mexsus saqchi ajritip linning bixeterlikini özliri qoghdaydighanliqini bildürgen we uning bilen charshenbe küni ikki yérim sa'et mexsus söhbetleshken.

Xongkong alahide rayoni 1997-yili xitaygha qayturup bérilgen bolsimu, emma öz aldigha musteqil qanun boyiche bashqurulidu.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet